Oʻtgan hafta davomida 100 ga yaqin davlat mulki ijaraga berildi

Mamlakatimizda 15 fev 2021, 12:06 3 283

Joriy yilning 8 - 12-fevral kunlari Davlat aktivlarini boshqarish agentligi huzuridagi Boʻsh turgan obyektlardan samarali foydalanishni tashkil etish markazi tomonidan respublika hududidagi umumiy maydoni 29 851 kv.m. boʻlgan 99 ta boʻsh turgan davlat mulki obyekti 865,8 mln. soʻm yillik ijara toʻlovi evaziga auksion savdolari orqali tadbirkorlik subyektlariga ijaraga berildi.

Jumladan, Samarqand viloyati, Samarqand shahridagi obyekt yillik ijara toʻlovi 11,5 mln. soʻmdan 42,4 mln.soʻmga yetganida savdo gʻolibi aniqlandi. Gʻolib 12 oy muddatga umumiy ovqatlanish faoliyatini tashkil etish imkoniyatini qoʻlga kiritdi.

Shuningdek, Qoraqalpogʻiston Respublikasi, Taxiatosh tumanidagi obyekt yillik ijara toʻlovi 1,0 mln. soʻmdan 25,5 mln.soʻmga yetganida savdo gʻolibi aniqlandi. Gʻolib 12 oy muddatga umumiy ovqatlanish faoliyatini tashkil etish imkoniyatini qoʻlga kiritdi.

Buxoro viloyati, Kogon shahridagi koʻchmas mulk obyekti uchun yillik ijara toʻlovi 2,7 mln.soʻmdan 24,5 mln.soʻmga yetganida auksion savdosi yakunlandi. Auksion gʻolibi 12 oy muddatga savdo faoliyatini tashkil etadi.