Investitsiyalar, sanoat va savdo vazirligi matbuot xizmatining xabar berishicha, loyihadan 10 ta hudud qamrab olinadi va u Oʻzbekiston sugʻorish tizimini modernizatsiya qilish boʻyicha Milliy dastur ijrosiga koʻmaklashadi. Natijada yiliga 251 ming Mvt⋅soat elektr energiyasi tejaladi va atmosfera havosiga chiqariladigan karbonat angidrid miqdori 117 ming tonnadan ortiq kamayadi. Shuningdek, loyiha doirasida nasos stansiyalarining tomlariga quyosh panellari oʻrnatilishi kabi qoʻshimcha infratuzilma ham yangilanadi.
Hozirgi kunda YTTBning Oʻzbekistondagi investitsiyaviy portfeli 5,6 milliard yevro qiymatidagi 181 ta loyihani oʻz ichiga oladi. Mablagʻlarning asosiy qismi xususiy sektorni rivojlantirishga yoʻnaltirilgan. Oʻzbekiston besh yildirki, Markaziy Osiyoda YTTB investitsiyalarining eng yirik manzili boʻlib qolmoqda.
