Uchrashuvda gilos eksporti boʻyicha Oʻzbekistonning salohiyati, asosiy parametrlari, taʼm sifati, rejalashtirilgan eksport hajmlari va logistika yoʻnalishlarining batafsil tavsifi taqdim etildi.
Oʻz navbatida, Xitoyning “Guangdong Electric Shore SCM Texnoloji” kompaniyasi raisi Van Veyxan joriy mavsumda oʻzbek gilosini Xitoyga olib kirishga katta qiziqish bildirdi. Buning natijasida tomonlar Fargʻona vodiysidan Guanchjou shahrigacha havo yoʻli orqali sinov partiyasi yetkazib berilishiga kelishib olishdi.
2019-yilda tashkil etilgan “Guangdong Electric Shore SCM Texnoloji” kompaniyasi ekzotik mevalar, muzlatilgan sabzavotlar, barra mol goʻshti, qoʻy goʻshti, tovuq goʻshti, dengiz mahsulotlari importi bilan shugʻullanadi. Mazkur kompaniya Xitoyning yirik ulgurji bozorlari, supermarketlari, elektron tijorat saytlari, muassasalari, yirik mehmonxonalari, davlat korxonalarini yuqori sifatli xorij mahsulotlari bilan taʼminlaydi.
