Oʻzbekistonning ishbilarmonlik faolligi indeksi dekabr oyida oʻsish koʻrsatkichidagi oʻrnini saqlab qoldi

Komponentlar darajasida quyidagi oʻzgarishlar boʻlgan.

2021-yilning dekabr oyida Ishbilarmonlik faolligi indeksi oʻtgan oyga nisbatan 8,5 foizga oshib, 1085 birlikni tashkil etishi, quyidagi komponentlar darajasidagi oʻzgarishlarga bogʻliq boʻlgan:

• xoʻjalik yurituvchi subyektlarning bank hisobvaraqalaridagi opreatsiyalar soni 13,6 foizga oshgan;
• faoliyat koʻrsatayotgan xoʻjalik yurituvchi subyektlar boʻyicha komponent 0,7 foizga oshgan;
• tovar-xom ashyo birjasida xom ashyo sotib olish jadalligi 8,6 foizga oshgan;
• tovar belgilari boʻyicha komponent 5,9 foizga oshgan.

Hududlar kesimida Jizzax viloyatida yana bir marta eng yuqori oʻsish surʼati qayd etilgan.

2021-yil dekabr oyida Ishbilarmonlik faolligi indeksi barcha hududlarda oʻtgan oyga (2021-yil noyabr) nisbatan oʻsish kuzatilgan. Jizzax (72,0%), Sirdaryo (51,3%), Xorazm (50,6%), Surxondaryo (46,6%) va Qashqadaryo (46,1%) viloyatlarida sezilarli darajada oʻsish kuzatilgan (2-rasm).

BANK HISOB VARAQALARI BOʻYICHA OPERATSIYALAR

2021-yil dekabr oyida banklararo toʻlov operatsiyalari soni 5 875,8 ming tani tashkil etdi va 2021-yilning noyabr oyiga nisbatan 705,1 ming tranzaksiyaga (13,6%) oshgan.

Banklararo toʻlov operatsiyalari soni barcha hududlarda oshgan.

2021-yil dekabrda respublikaning barcha hududlarida yuridik shaxslar oʻrtasidagi bank operatsiyalari soni oʻtgan oyga nisbatan oshgan. Xususan, sezilarli darajadagi oʻsish Andijon (25,5%), Jizzax (21,7%), Qashqadaryo (20,1%), Samarqand (19,1%) va Surxondaryo (19,0%) viloyatlarida kuzatilgan.

TOVAR-XOM ASHYo BIRJASIDAGI FAOLLIK

2021-yilning dekabr oyida IFIning birja komponenti 1,0859 birlikni tashkil etdi. Bu esa ushbu komponentning oʻtgan oyga nisbatan 8,6 foizga oshganligini anglatib, bitimlar sonining (17,5%) oshganligi bilan izohlanadi.

Respublika tovar-xom ashyo birjasida tovarlar savdosi umumiy aylanmasi hajmi 2021-yil dekabr oyida 6 668,9 mlrd. soʻmni tashkil etib, ushbu koʻrsatkich oʻtgan oyga nisbatan 13,5 foizga oshgan.

XOʻJALIK YURITUVCHI SUBʼEKTLARNING FAOLLIGI

Faoliyat yuritayotgan xoʻjalik subyektlari boʻyicha komponent 2021-yil dekabr oyida 1,0065 birlikni tashkil etib, oʻtgan oyga nisbatan 0,7 foizga oshganligini koʻrsatadi. Ushbu koʻrsatkich oʻtgan yilning mos davriga nisbatan ijobiy oʻzgarib, 8,5 foizga oshgan.

2021-yil dekabr oyida barcha turdagi faoliyat yuritayotgan xoʻjalik yurituvchi subyektlar soni 2021-yilning noyabr oyiga (569 275 birlik) nisbatan 4 236 taga koʻpayib, 573 511 birlikni tashkil etgan.

Yirik tadbirkorlik bilan shugʻullanuvchi korxonalar soni 16 taga oshgan.

Hisobot davrida, kichik korxonalar soni 458 538 tadan 462 834 tagacha oshgan (oʻsish 4 296 ta). Fermer xoʻjaliklari soni 107 698 tadan 107 622 tagacha (kamayish 76 ta) kamaygan. Yirik tadbirkorlik bilan shugʻullanayotgan subyektlar soni 3 055 tani tashkil etib, 2021-yilning noyabr oyiga nisbatan 16 taga oshgan.

BRENDLARNI ROʻYXATGA OLISH

2021-yil dekabr oyida savdo belgilari muhofazasi boʻyicha biznes faolligi indeksi 1,0590 birlikni tashkil etib, ushbu koʻrsatkich 2021-yilning noyabr oyiga nisbatan 5,9 foizga oshgan. Joriy yilning dekabr oyida yuridik shaxslar tomonidan 359 ta tovar belgilari va tovar nomlari roʻyxatga olingan.

Oʻzbekiston Respublikasi va mintaqalar boʻyicha IFI komponentlarining oʻtgan oyga nisbatan oʻzgarishi

Oʻzbekiston Respublikasi va mintaqalar boʻyicha IFI komponentlarining oʻtgan yilning mos oyiga nisbatan oʻzgarishi

Ruslan Abdullayev,

Iqtisodiy tadqiqotlar va islohotlar markazi