Qirg'iziston parlamenti deputatlari o'zini-o'zi muddatidan oldin tarqatib yuborish to'g'risidagi qarorni ma'qulladi. Yig'ilgan 89 a'zodan 84 nafari ushbu qarorni yoqlab ovoz berdi. Qirg'iziston parlamentining amaldagi chaqirig'i yangi saylovlarning rasmiy sanasi e'lon qilinmaguncha o'z faoliyatini davom ettiradi.

Muddatidan oldin iste'foga chiqish tashabbusi kuz boshida bir guruh qirg'izistonlik deputatlar tomonidan ilgari surilgan edi. Ular masalani kun tartibiga kiritish uchun hamkasblarining kamida 30 nafar imzosini to'plashlari kerak edi. G'oya mualliflarining ta'kidlashicha, konstitutsiyaga ko'ra, mamlakatda navbatdagi parlament saylovlari 2026-yilning noyabrida, atigi olti haftadan so'ng prezidentlik saylovlari o'tkazilishi belgilangan. Ularning fikricha, bu mamlakat byudjetiga qo'shimcha yuk bo'lishiga, Markaziy saylov komissiyasi uchun texnik va tashkiliy qiyinchiliklarga olib keladi. “Bu siyosiy beqarorlikka olib kelishi mumkin. Ikkita bunday keng ko'lamli kampaniyani o'tkazish juda katta resurslarni talab qiladi – moliyaviy, insoniy va texnik. Tizimning haddan tashqari yuklanishi, xatolar va hatto qonun buzilishi xavfi bor”, dedi deputat Ulan Primov.

Hozirda Qirg'iziston parlamenti 90 deputatdan iborat bo'lib, ularning bir qismi partiya ro'yxati bo'yicha, qolganlari esa bir mandatli saylov okruglari bo'yicha saylangan.

Bu zamonaviy Qirg'izistonda parlamentning o'zini birinchi marta tarqatib yuborishi emas. Birinchi marta bunday holat 1994-yilda sodir bo'lgan. Ikkinchi marta 2010-yilda respublikada mamlakatning ikkinchi Prezidenti Qurmanbek Bakiyev hokimiyatdan ag'darilgan inqilobdan keyin yuz bergan. Parlament vakolatlarining muddatidan oldin tugatilishi bilan bog'liq yana bir holat 2007-yilda Prezident Bakiyevning farmoni asosida amalga oshgan edi, deb xabar berdi tass.ru.