Tomonlar amaldagi ikki tomonlama kelishuvlarning bajarilishi hamda mamlakatlar oʻrtasidagi savdo-iqtisodiy va sarmoyaviy hamkorlikni rivojlantirish boʻyicha navbatdagi tadbirlarni muhokama qildilar.
Laziz Kudratov Arman Shakkaliyevning Oʻzbekistonga tashrifi doirasida boʻlib oʻtgan “Termiz” xalqaro savdo markazida Qozogʻiston mahsulotlari pavilyonining ochilishini yuqori baholadi va pavilyonning muvaffaqiyatli ishlashi hamda afgʻon ishbilarmonlari tomonidan unga katta qiziqish bildirilishiga ishonch bildirdi.
Oʻzaro tovar ayirboshlash izchil rivojlanib borayotgani qayd etildi. 2024-yilda oziq-ovqat mahsulotlari, toʻqimachilik, rangli metallar, kimyo mahsulotlari va plastmassa mahsulotlari eksporti koʻpaydi hamda tovar ayirboshlash hajmi qariyb 4,3 milliard dollarga yetdi. Tomonlar mahsulot hajmini oshirish, toʻsiqlarni bartaraf etish va mahsulotlarni oʻzaro yetkazib berish sharoitlarini yaxshilash boʻyicha kompleks chora-tadbirlarni qabul qilishga tayyor ekanliklarini tasdiqladilar.
Sarmoyaviy hamkorlik koʻlami kengayib boryapti. Oʻzbekistonda Qozogʻiston kapitali ishtirokidagi 1042 ta korxona faoliyat yuritadi, ularning aksariyati ulgurji va chakana savdo, IT-xizmatlari, qurilish, moliya va sugʻurta faoliyati, koʻchmas mulk bilan bogʻliq operatsiyalar bilan shugʻullanadi. Ayni paytda Qozogʻistonda Oʻzbekiston sarmoyasi ishtirokidagi 4,5 mingdan ortiq kompaniya roʻyxatga olingan. Tadbirkorlarni oʻzaro asosda tizimli qoʻllab-quvvatlash mexanizmlarini kengaytirish boʻyicha kelishuvga erishildi.
Uchrashuv yakunlari boʻyicha tomonlar 2030-yilgacha mamlakatlar oʻrtasidagi tovar ayirboshlash hajmini 10 milliard dollarga yetkazish Dasturini imzoladilar hamda 2025-yilda Oʻzbekiston va Qozogʻiston hududlari rahbarlarining oʻzaro tashriflari jadvalini tasdiqladilar, deb xabar beradi Investitsiyalar, sanoat va savdo vazirligi matbuot xizmati.
