Vazir I. Abdurahmonov Oʻzbekiston-Xitoy hamkorligida amalga oshirilayotgan ZF-UZ-VAC2001 vaksinasining sinov jarayonlari haqida maʼlumot berdi. Xususan, Innovatsion rivojlanish vazirligi huzuridagi Ilgʻor texnologiyalar markazi, Sogʻliqni saqlash vazirligi huzuridagi Virusologiya ilmiy-tadqiqot instituti va Xitoy farmkompaniyasi bilan uch tomonlama memorandum doirasidagi III faza sinovlarida mazkur vaksinaning xavfsizligi yuqori baholanganini qayd etdi.
Bugungi kunga kelib 6836 nafar koʻngilli vaksinaning 1-dozasi, 4453 nafar koʻngilli vaksinaning 2-dozasi va 283 nafar koʻngilli 3-doza bilan emlandi. Ushbu sinovda qatnashgan fuqarolarning 6 nafaridagina ozroq nojoʻya taʼsir – allergik reaksiya kuzatildi. Bu 0,01 foiz boʻlib, vaksinaning xavfsizligidan dalolat beradi.
Oʻz navbatida Ilgʻor texnologiyalar markazi direktori oʻrinbosari Dilbar Dolimova ZF-UZ-VAC2001 rekombinant vaksina ekani tushuntirib, emlash jarayonida inson organizmiga koronavirusning tojining bir boʻlagi kiritilishi haqida gapirdi.
– Bu usul nojoʻya taʼsirlarni oldini olishga xizmat qiladi, negaki unda faqatgina virusning tashqi oqsili ishlatiladi, – dedi D. Dolimova. – ZF-UZ-VAC2001 ni oddiy muzlatkichda 2-8 daraja haroratda saqlash mumkinligi ham mazkur vaksinaning ijobiy tomonidir.
Darxan Satibaldi Oʻzbekiston va Xitoy davlatlari hamkorligida yaratilgan ZF-UZ-VAC2001 yangi rekombinant vaksina sinovlari muvaffaqiyatli oʻtayotgani bilan qutladi. Shuningdek, ushbu vaksina borasida Qozogʻiston ommaviy axborot vositalarida ham materiallar berilayotgani haqida gapirdi. Elchi janoblari Oʻzbekiston-Xitoy vaksinasini Qozogʻistonga ham yetkazish masalasini muhokama qilish boʻyicha taklif tayyorlashini bildirdi.
Suhbat yakunlangach, Qozogʻiston elchisi Darxan Satibaldi va ikki nafar Qozogʻiston elchixonasi xodimlari ZF-UZ-VAC2001 vaksinaning 1-dozasi bilan emlandilar.