Darslikni oʻzlashtirish davomida rahbarning maʼnaviy qiyofasi, rahbar axloqi va boshqaruv madaniyati, rahbarning fazilatlari, rahbarning muloqot madaniyati, rahbar kitobxonligi, davlatchilik tarixida rahbarlarning boshqaruv salohiyati va tajribalari, rahbarning sharqona goʻzal fazilatlari, oʻzbek va jahon adabiyotining yuksak namunalari bilan tanishadi hamda badiiy adabiyotdan rahbarlik faoliyatida foydalanish koʻnikmalariga ega boʻladi.
Darslikda rahbar axloqi va odobi, rahbarning maʼnaviy qiyofasi va imijini yuksaltirish, muloqot madaniyati va notiqlik mahoratini oshirish, jamoatchilik bilan aloqalar oʻrnatishda axloq meʼyorlariga rioya etish koʻnikmalarini rivojlantirish nazarda tutilgan. Uning mazmuni boshqaruv jarayonida tarixiy-madaniy merosdan oqilona foydalanish hamda mafkuraviy kurash avj olgan sharoitda milliy qadriyatlarni asrash kabi masalalarni qamrab olgan.
Oʻzbekiston Respublikasi Prezidentining 05.05.2025-yildagi “Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari toʻgʻrisida”gi PF-78-sonli Farmoniga asosan tinglovchilarda davlat, jamiyat va xoʻjalik boshqaruvida zamonaviy usullardan foydalanish boʻyicha puxta bilimlarni egallash, tizimli tahlil va strategik rejalashtirish, murakkab sharoitlarda qarorlar qabul qilish koʻnikmalarini hamda tashabbuskorlik va liderlik sifatlarini shakllantirish orqali rahbar xodimlarga xos umumkasbiy kompetensiyalarni rivojlantirishga yoʻnaltirilgan.
Ushbu darslik Oʻzbekiston Respublikasi Prezidenti huzuridagi Davlat siyosati va boshqaruv akademiyasi magistraturasi tinglovchilari uchun Akademiya kengashi tomonidan tasdiqlangan oʻquv rejaga muvofiq ishlab chiqilgan.
