- Mana, bugun viloyatlaringizga yangi hokim qoʻydik. Mahallabay ishlash tizimini joriy qilyapmiz. Haqiqiy ahvolni bilish, odamlarning ogʻirini yengil qilish uchun mahallangizga oʻzim keldim, - dedi Shavkat Mirziyoyev ayollar bilan suhbatda.
Onaxonlardan biri ertaga oʻgʻlining toʻyi boʻlishini aytdi. Prezident ularni tabriklab, yosh oilaga baxt, sogʻlik tiladi.
Kutilmagan tashrifdan xursand boʻlgan odamlar davlatimiz rahbariga sihat-salomatlik, xalqimizga tinchlik-farovonlik tilab duolar qildi.
Sohibqiron Temur koʻchasi boʻylab yurilib, uy-joylar, savdo shoxobchalari koʻzdan kechirildi.
Shavkat Mirziyoyev mahalla idorasiga kirib, mahalla raisi va maslahatchilar bilan suhbatlashdi. Aholining yashash sharoitlari, hududdagi muammolarni soʻradi. Ularni hal etish boʻyicha mutasaddilarga koʻrsatmalar berdi.
