Shuningdek, forum ikki mamlakat biznes vakillari oʻrtasida toʻgʻridan-toʻgʻri aloqalarni rivojlantirish va oʻsish nuqtalarini aniqlash uchun samarali platforma boʻlib xizmat qildi.

Forum ishiga parallel ravishda qoʻshma korxonalar va mahalliy tadbirkorlar tomonidan ishlab chiqarilayotgan sanoat, charm-poyabzal, qishloq xoʻjaligi hamda hunarmandchilik mahsulotlari koʻrgazmasi ham boʻlib oʻtdi, deb xabar beradi “Oʻzcharmsanoat” uyushmasi matbuot xizmati.

Ikki mamlakat oʻrtasidagi savdo-iqtisodiy hamkorlik aloqalari charmsanoat sohasida ham shiddat bilan rivojlanib boryapti. Oʻzaro munosabatlarning dinamik oʻsishi natijasida Xitoy kapitali asosida mamlakatimizda yangi qoʻshma korxonalar ish boshlayapti. Eksport hajmi kengayib boryapti.

Jumladan, 2018-2022-yillar kesimida olib qaraydigan boʻlsak mazkur vaqt oraligʻida Xitoy kapitali asosida umumiy qiymati 243,5 million dollarlik 53 ta investitsiya loyihalari amalga oshirilgan. Xususan, tayyor charm, poyabzal, tag charm, charm-attorlik buyumlari, sport mahsulotlari, kimyoviy moddalar ishlab chiqarish yoʻnalishlarida yirik quvvatlar ishga tushirilib, mahsulotlarning koʻp qismi eksportga yoʻnaltirildi.

Ayni sohadagi hamkorlik aloqalarini yanada rivojlantirish maqsadida 2023-2025-yillar uchun sohani rivojlantirish strategiyasiga asosan XXR bilan umumiy qiymati 520 million dollar boʻlgan 135 ta loyiha amalga oshiriladi.

Eksport yoʻnalishida ham oʻsishni kuzatish mumkin. 2022-yilda soha korxonalari tomonidan Chin yurtiga 33,6 million dollarlik mahsulotlar eksport qilingan. 2023-yilda esa bu koʻrsatkich 46,7 million dollarga yetishi kutilyapti. Tahlillarga koʻra 2024-yilda 60,3 million dollarlik eksport amalga oshirilsa, 2025-yilda bu hajm 87,1 million dollarga yetishi kutilyapti.
Sirdaryoda boʻlib oʻtgan biznes forum esa ushbu koʻrsatkichlarni yanada oshirish, savdo-iqtisodiy aloqalarning kengayishiga xizmat qildi.