Hujjat bilan quyidagilar tasdiqlandi:
- 2022-yilda Qoraqalpogʼiston, viloyatlar va tumanlarda qishloq xoʼjaligi ekinlarini sugʼorish uchun suv olish limitlari;
- 2022-yil yozgi sugʼorish mavsumida kutilayotgan suv tanqisligining salbiy taʼsirini yumshatish hamda mavjud suv resurslaridan samarali foydalanish tadbirlarini muvofiqlashtirish boʼyicha respublika ishchi guruhining tarkibi;
- Suv xoʼjaligi vazirligi tizimidagi tashkilotlar tomonidan nasos stantsiyalari va vertikal sugʼorish quduqlarini ishlatish uchun 2022 yilda sarflanadigan elektr energiyasi miqdorlari;
- 2022-yilda amalga oshiriladigan irrigatsiya tizimlari va ulardagi gidrotexnika inshootlarini, nasos agregatlari va sugʼorish quduqlarini taʼmirlash-tiklash va qurish ishlari rejasi.
Respublika ishchi guruhining asosiy vazifalari:
- yirik suv omborlarida suv resurslaridan foydalanishni nazoratga olish, xususan suv chiqarishni qatʼiy ravishda hokimliklarning aniq hisob-kitoblariga asoslangan talabnomalar boʼyicha amalga oshirish;
- gidromeliorativ tarmoqlarning mavsumga shayligini taʼminlash bilan bogʼliq barcha tadbirlarning bajarilishi boʼyicha qatʼiy nazorat olib borish tizimini yoʼlga qoʼyish;
- suvni tejaydigan sugʼorish texnologiyalarini “bir kanal - bir tizim” tamoyili asosida joylashtirish;
- sugʼorish mavsumi davomida suv resurslaridan samarali foydalanish holatini har kuni tahlil qilib borish.