Bu haqda Xalqaro valyuta jamg'armasi rasmiy vakili Juli Kozak jurnalistlar uchun o'tkazilgan navbatdagi brifingda ma'lum qildi.

Undan Qizil dengizdagi kemalarga husiylar hujumlarining ta'siri haqida izoh berish so'ralgan. Kozakning aytishicha, 13-fevral holatiga ko'ra, Suvaysh kanali orqali yuk tashish hajmi o'tgan yilning shu davriga nisbatan 55 foizga kamaydi.

G'azo sektoridagi mojaro avj olgandan so'ng, “Ansor Alloh” Falastin anklavida operatsiya to'xtamaguncha Isroil hududiga hujumlar uyushtirishi va unga aloqador kemalarning Qizil dengiz va Bob al-Mandeb bo'g'ozi suvlari orqali o'tishiga ruxsat bermasligi haqida ogohlantirdi. O'tgan yilning noyabr oyi o'rtalaridan beri husiylar Qizil dengiz va Adan ko'rfazida o'nlab tinch aholi kemalariga hujum qilgan.

“Ansor Alloh”ning harakatlariga javoban Amerika rasmiylari xalqaro koalitsiya tuzib, Qizil dengizda navigatsiya erkinligini ta'minlash va kemalarni himoya qilish maqsadida Prosperity Guardian operatsiyasini boshladi. 12-yanvar kuni Buyuk Britaniya va AQSh qurolli kuchlari samolyotlar, kemalar va suv osti kemalari yordamida Yamanning qator shaharlarida husiylar nishonlariga ilk zarbalarni berdi, deb xabar beradi report.az.