Unda mutasaddi vazirliklar, mahalliy kengash deputatlari tomonidan hududlarda tashqi iqtisodiy aloqalar samaradorligini oshirish va tadbirkorlikni rivojlantirish faoliyatiga aloqador, keng muhokamalarga sabab boʻlayotgan masalalar yuzasidan tanqidlarga tezkorlik bilan munosabat berish amaliyoti hamda oʻzaro hamkorlikni kuchaytirish masalalari boʻyicha zarur boʻlgan nazariy asoslar va amaliy koʻnikmalar haqida batafsil maʼlumotlar berildi.
Bundan tashqari, seminarda mamlakatimizning ayrim hududlarida xorijiy investitsiyalar ishtirokidagi loyihalar kamligi, ishlab chiqarish jarayonlariga ilgʻor eksportbob texnologiyalar yetarlicha joriy etilmayotganligi, ularga toʻsqinlik qiluvchi omillarni bartaraf etish boʻyicha qilinayotgan ishlar haqida soʻz bordi.
Jumladan, deputatlar va tadbirkorlar oʻrtasida yaqindan doimiy muloqot qilish platformasi muntazam ishlamayotgani, bunda doimiy komissiyalar majlislari va kengashlar sessiyalarida loyihalar hamda tegishli dolzarb muammolar faol muhokama qilinmayotganligi tanqid qilindi.
Ochiq va qizgʻin muhokama davomida mahalliy Kengash deputatlari tomonidan dolzarb va amaliy fikr-mulohazalar bildirildi.
Xususan, eksport jarayonlari natijadorligini oshirish va pirovardida yangi ish joylarini yaratish, aholi daromadlarini oshirishga qaratilgan tizimli chora-tadbirlarni koʻrish, xorijiy hamkorlar bilan savdo-iqtisodiy aloqalarni kengaytirish zarurligiga alohida urgʻu berildi.
Oʻzbekiston Respublikasi Oliy Majlisi Senati Axborot xizmati.
