Loyihaga koʻra, 2021/2022 oʻquv yilidan boshlab:
xizmat majburiyatini bajarish chogʻida halok boʻlgan, shuningdek, xizmat majburiyatini bajarishda olgan jarohati tufayli nogiron boʻlib qolgan, kontuziya, shikast olgan yoki kasalliklarga duchor boʻlgan bojxona organlari xodimlarining farzandlari Oʻzbekiston Respublikasi Davlat bojxona qoʻmitasi raisining tavsiyanomasi asosida belgilangan qabul koʻrsatkichlaridan tashqari davlat granti asosida Oʻzbekiston Respublikasi davlat oliy taʼlim muassasalarining bakalavriatiga (ikkinchi taʼlimdan tashqari) tanlovsiz qabul qilinadilar;
xizmat majburiyatini bajarish chogʻida halok boʻlgan, shuningdek, xizmat majburiyatini bajarishda olgan jarohati tufayli nogiron boʻlib qolgan, kontuziya, shikast olgan yoki kasalliklarga duchor boʻlgan bojxona organlari xodimlarining farzandlari Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Milliy gvardiya va Davlat bojxona qoʻmitasining oliy (magistratura, ikkinchi va oliy oʻquv yurtidan keyingi taʼlimdan tashqari) va oʻrta maxsus taʼlim muassasalariga qabul kvotalaridan tashqari dastlabki va kasbiy (harbiy-professional) tanlov natijalari, shuningdek Davlat bojxona qoʻmitasi raisining taqdimnomasi asosida qabul qilinadilar.
2021-yil 1-sentyabrdan boshlab Oʻzbekiston Respublikasi davlat bojxona qoʻmitasi raisiga toʻlov-shartnoma (oshirilgan toʻlov-shartnoma stavkasi bundan mustasno) asosida oliy taʼlim muassasalari bakalavriatiga (ikkinchi taʼlimdan tashqari) oʻqishga mazkur qaror qabul qilingunga qadar kirgan, shuningdek, oʻqish davomida ushbu holatlarda ota-onasini yoʻqotgan taqdirda:
xizmat majburiyatlarini bajarish chogʻida halok boʻlgan bojxona organlari xodimlarining farzandlariga - shartnomalarning toʻliq hajmi;
xizmat majburiyatlarini bajarish chogʻida olgan jarohati tufayli nogiron boʻlib qolgan, kontuziya, shikast olgan yoki kasalliklarga duchor boʻlgan bojxona organlari xodimlarining farzandlariga -shartnomalarning ellik foizi miqdori Oʻzbekiston Respublikasi Davlat bojxona qoʻmitasining Moddiy yordam, ijtimoiy himoya, bojxona organlarini rivojlantirish va koʻzda tutilmagan xarajatlar maxsus jamgʻarmasi mablagʻlari hisobidan toʻlab beriladi.
2021/2022 oʻquv yilidan boshlab mamlakat iqtisodiy xavfsizligini taʼminlash, bojxona maʼmurchiligini takomillashtirish, tartib-taomillarni soddalashtirish, amaliyotga ilgʻor axborot texnologiyalarini joriy etish, kontrabanda va bojxona qonunchiligi buzilishiga qarshi kurashishda hamda bojxona organlari faoliyatining samaradorligini oshirishga munosib hissa qoʻshgan, xizmat, ilmiy yoki pedagogik faoliyatda yuqori natijalarga erishgan bojxona organlarining amaldagi xodimlari farzandlariga:
oliy taʼlim muassasalariga belgilangan davlat granti asosida qabul koʻrsatkichlarining uch foizi miqdorida davlat granti asosidagi qoʻshimcha qabul koʻrsatkichlari ajratiladi;
harbiy taʼlim muassasalariga kirish uchun kursantlar (oʻquvchilar)ni qabul qilishning umumiy sonidan ikki foizli kvota ajratiladi.
Davlat bojxona xizmati organlari xodimlari farzandlarining davlat oliy taʼlim muassasalari hamda harbiy taʼlim muassasalariga oʻqishga kirishi uchun tavsiyanoma (taqdimnoma) berish tartibi toʻgʻrisidagi nizom tasdiqlanadi.
Loyihada keltirilishicha, xodimlarning farzandlarini ajratilgan uch foizli kvotalar doirasida oliy taʼlim muassasalariga qabul qilish Oʻzbekiston Respublikasi Davlat bojxona qoʻmitasi raisining tavsiyanomasi boʻyicha tanlov asosida amalga oshiriladi hamda oʻrinlar Oʻzbekiston Respublikasi Vazirlar Mahkamasi huzuridagi Davlat test markazi tomonidan oʻtkaziladigan test sinovlari natijalari boʻyicha toʻplangan ballardan kelib chiqib, abituriyent kirish imtihonlarining eng yuqori ballidan kamida oʻttiz foizini toʻplagan taqdirda, ketma-ketlik tartibida taqsimlanadi;
xodimlarning farzandlari uchun ajratilgan ikki foizli kvotalar doirasida harbiy taʼlim muassasalariga qabul qilish dastlabki va kasbiy (harbiy-professional) tanlov natijalari, shuningdek, Oʻzbekiston Respublikasi Davlat bojxona qoʻmitasi raisining taqdimnomasi asosida amalga oshiriladi;
xodimlar, shu jumladan xizmat majburiyatini bajarish chogʻida halok boʻlgan, shuningdek, xizmat majburiyatini bajarishda olgan jarohati tufayli nogiron boʻlib qolgan, kontuziya, shikast olgan yoki kasalliklarga duchor boʻlgan bojxona organlari xodimlarining farzandlarini oliy taʼlim muassasalari va harbiy taʼlim muassasalariga oʻqishga qabul qilish uchun tavsiyanoma (keyingi oʻrinlarda - tavsiyanoma) Oʻzbekiston Respublikasi Davlat bojxona qoʻmitasi raisi tomonidan Davlat bojxona qoʻmitasi Kadrlar boshqarmasi boshligʻining iltimosnomasi asosida beriladi;
tavsiyanoma bir oliy taʼlim muassasasi yoki harbiy taʼlim muassasasiga bir marta kirish uchun uch yildan koʻp boʻlmagan muddatga beriladi;
xodimlarning farzandlariga ushbu qarorda koʻzda tutilgan tavsiyanoma bilan bir qatorda muddatli harbiy xizmatni oʻtaganligi boʻyicha harbiy qism qoʻmondonligining tavsiyanomasi ham mavjud boʻlsa, ularni tanlov asosida oliy taʼlim muassasalarining bakalavriatiga oʻqishga qabul qilish qoʻmondonlik tavsiyanomasida belgilangan qoʻshimcha ballarni hisobga olgan holda amalga oshiriladi;
