Yigʻilish yakunlari boʻyicha viloyatning suv-energetika balansini tartibga soluvchi qator protokollar imzolandi, deya xabar beradi oz.inform.kz sayti.
Oʻzbekiston Energetika vazirligining xabar berishicha, kuz-qish mavsumida uch mamlakat suv-energetika tizimining barqaror ishlashini taʼminlash va bu boradagi hamkorlik aloqalarini yanada chuqurlashtirish masalalari uchrashuvda muhokama qilindi.
Uchrashuv soʻngida tomonlar oʻrtasida doimiy ishchi guruh yigʻilishlarini oʻtkazib turishga kelishildi va tegishli bayonnomalar imzolandi.
Qozogʻiston hukumati saytining xabarida aytilishicha, asosiy hujjat Toʻqtogʻul suv omboridan suv tashlanishini taʼminlash boʻyicha tomonlarning majburiyatlarini qayd etadi. Bu esa, Qirgʻiz Respublikasiga Qozogʻiston va Oʻzbekistondan elektr energiyasi yetkazib berish evaziga amalga oshiriladi. Shuningdek, Rossiya Federatsiyasidan Qirgʻizistonga elektr energiyasi tranziti shartlari ham Qozogʻiston energetika tizimi orqali kelishib olingan. Ushbu choralar suv omborida zarur darajada suv saqlash va Qozogʻistonning janubiy viloyatlarini vegetatsiya davrida suv bilan taʼminlashga qaratilgan.
Tashrif doirasida ikki tomonlama muzokaralar ham boʻlib oʻtdi. Oʻzbekiston tomoni bilan Qozogʻistonga 2026-yil martdan dekabrigacha taxminan 900 mln kVt/soat hajmda elektr energiyasi yetkazib berish protokoli imzolandi. Bu hajm Janubiy Qozogʻiston energetika hududida stansiyalardagi taʼmir ishlari vaqtida yuzaga kelishi mumkin boʻlgan energiya tanqisligini qoplash uchun moʻljallangan.
— “Suv-energetika sohasida ishonchli ishlash maksimal aniqlik va jadvallarga qatʼiy rioya etishni talab qiladi. Imzolangan protokollar – aniq raqamlar, muddatlar va narxlar koʻrsatilgan ishchi hujjatlardir”, – deya uchrashuv yakunini izohladi vazir Yerlan Akkenjenov. – “Biz yetkazib berishning texnik shartlarini qayd etdik va mavjud masalalarni hal qildik. Qozogʻiston oʻz majburiyatlarini bajaradi va hamkorlardan ham shunday yondashuvni kutadi. Bu butun mintaqaning energetika tizimi va suv taʼminoti barqarorligining asosidir”.
Tuzilgan kelishuvlar yaqinlashib kelayotgan kuz-qish mavsumida xavflarni kamaytirish imkonini beradi. Shuningdek, ular kelgusi vegetatsiya davri uchun taxminiy suv zaxiralarini toʻplash uchun qulay shart-sharoitlar yaratadi, deyiladi xabarda.
