— Oʻzbekiston Respublikasi Prezidenti Sh.M.Mirziyoyevning tashabbusi bilan oʻtkazilgan “Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusidagi Toshkent konferensiyasi tarixiy voqea, koʻp jihatdan noyob forum boʻldi, – dedi Senat Raisining birinchi oʻrinbosari S. Safoyev. – Toshkentda bunday oʻta nufuzli xalqaro tadbir tashkil etilishi va muvaffaqiyatli oʻtkazilishi soʻnggi yillarda butun dunyoda taʼsiri tobora ortib borayotgan Yangi Oʻzbekiston paydo boʻlganining yorqin dalilidir.
Mintaqamizda oʻzaro ishonch va muammolarni birgalikda hal etishga intilish yuzaga keldi, oʻzaro savdo hajmi sezilarli darajada oʻsdi: oʻtgan 4 yil mobaynida Oʻzbekistonning qoʻshni mamlakatlar bilan savdo aylanmasi 5 barobar oshdi. Vujudga kelgan yangi siyosiy muhit Markaziy Osiyo va boshqa mintaqalar oʻrtasidagi aloqalarni kengaytirish uchun shart-sharoit yaratadi.
Bugun Janubiy Osiyo yangi qiyofasiga ega boʻlmoqda. Uning jahon iqtisodiyotidagi roli ham ortib boryapti. Bu yalpi ichki mahsuloti deyarli 3,5 trillion dollarni tashkil etuvchi jadal rivojlanayotgan mintaqadir. U jahonning iqtisodiy markazlaridan biriga aylanmoqda.
Shu bois, konferensiya gʻoyalarini amalga oshirish 2 milliarddan ortiq nufuzga ega, sayyoramiz xavfsizligi va barqaror rivojlanishiga katta taʼsir koʻrsatadigan ulkan makromintaqa rivojlanishiga kuchli taʼsir koʻrsatishga qaratilgan.
Oʻzbekiston Respublikasi
Oliy Majlisi Senatining
Axborot xizmati