Mazkur holat yuzasidan Toshkent shahar IIBB tomonidan oʻtkazilgan tekshiruvlar davomida aniqlanishicha, 1985 yilda tugʻilgan ayol Yunusobod tumanidagi yashash xonadonida oʻgay farzandi — 2013 yilda tugʻilgan qizga nisbatan bir necha bor jismoniy tazyiq oʻtkazgan.

Qayd etilishicha, ushbu holat boʻyicha jabrlanuvchi avval ichki ishlar organlariga murojaat qilmagan.

Hozirda voyaga yetmagan jabrlanuvchi Voyaga yetmaganlarga ijtimoiy-huquqiy yordam koʻrsatish markaziga joylashtirilib, davlat organlari himoyasiga olingan.

Holat yuzasidan Yunusobod tumani IIO FMB huzuridagi tergov boʻlimi tomonidan gumonlanuvchiga nisbatan Oʻzbekiston Respublikasi Jinoyat kodeksining 110-moddasi — «Qiynoq» bilan jinoyat ishi qoʻzgʻatilgan.

Taʼkidlanishicha, tergov harakatlari har tomonlama olib borilib, ish yuzasidan qonuniy qaror qabul qilinish taʼminlanadi. Mazkur jinoyat ishi Ichki ishlar vazirligi tomonidan nazoratga olingan.