Prognozlashtirish va makroiqtisodiy tadqiqotlar instituti ekspertlari tomonidan oʻtkazilgan tahlil mazkur davr mobaynida mamlakatimizda yuk tashish aylanmasida sezilarli oʻsish boʻlganligini koʻrsatdi. Barcha transport turlarida umumiy yuk aylanmasi 2017-yildagi 66,9 milliard t-km.dan 2022-yilda 75,2 milliard t-km.ga oshdi.
Xususan, 2017-2022-yillarda temir yoʻl transportida tashilgan yuk aylanmasi 22,9 milliard t-km.dan 24,9 milliard t-km.ga oshgan. Avtomobil transportining hissasiga toʻgʻri keluvchi yuk aylanmasi qariyb 1,5 barobar oshgan. Agar tahlil qilinayotgan davr boshida mazkur koʻrsatkich 13,6 milliard t-km.ni tashkil etgan boʻlsa, 2022-yilga kelib 20,2 milliard t-km.ga yetdi.
2017-2022-yillarda havo transportining yuk aylanmasi 2 barobarga, yaʼni 156,9 million t-km.dan 322,7 million t-km.gacha oshdi.
Transport xizmatlari bozori va infratuzilmasini rivojlantirish maqsadida 2022 — 2026-yillarga moʻljallangan Yangi Oʻzbekistonning Taraqqiyot strategiyasida bir qator tadbirlar belgilangan. Jumladan:
- hududlarda yuklar shakllanishining asosiy nuqtalarini hisobga olgan holda transport-logistika markazlari tarmogʻini tashkil etish;
- xalqaro yuk tashuvlaridagi transport hujjatlarini (“e-Permit”, “e-TIR”, “e-CMR” ) elektron koʻrinishga bosqichma-bosqich oʻtkazish;
- mavjud konteyner terminallarini davlat-xususiy sheriklik asosida rivojlantirish;
- temir yoʻlda konteyner tashish ulushini kamida 2 barobar oshirish rejalashtirilgan.
Umuman aytganda, yuk aylanmasining barqaror oʻsishi transport infratuzilmasini rivojlantirish va tashqi savdo faoliyatini erkinlashtirish natijasidir. Kelgusida yuk aylanmasini yanada oshirishga qaratilgan saʼy-harakatlar zamirida raqamlashtirish, infratuzilmalarni modernizatsiya qilish va tashuvchilar uchun qulay shart-sharoitlarni yaratish yotadi.
