Xususan, oʻzaro tovar ayirboshlash hajmining oʻsishidagi ijobiy tendensiya yuzasidan fikr almashildi. Tomonlar oʻzaro tovar ayirboshlash doirasini kengaytirish va hajmini oshirish, imtiyozli savdo bitimini ratifikatsiya qilish jarayonini faollashtirish orqali kompleks chora-tadbirlarni koʻrishga, savdo sohasidagi toʻsiqlarni bartaraf etish, savdo operatsiyalarini amalga oshirishda bojxona tartib-taomillarini soddalashtirish va bu sohada raqamli yechimlarni joriy etishga tayyor ekanliklarini bildirdilar.
Qayd etilganidek, 2022-yilda Samarqand shahrida boʻlib oʻtishi kutilayotgan Turkiy davlatlar tashkiloti sammiti hamda yaqin oylarda Oʻzbekistonda oʻtkazilishi rejalashtirilgan Qoʻshma bojxona kengashining 3-yigʻilishi doirasida oʻzaro savdoni rivojlantirish boʻyicha qator qoʻshimcha, ikki tomonlama va koʻp tomonlama chora-tadbirlar kelishilishi mumkin.
Ikki davlat oʻrtasida transport infratuzilmasini rivojlantirish, yoʻnalishlarni diversifikatsiya qilish, toʻgʻridan-toʻgʻri va tranzit yuk tashish hajmini oshirish boʻyicha chora-tadbirlarni amalga oshirish istiqbollari koʻrib chiqildi. Tomonlar transport-logistika sohasida ijobiy dinamikani saqlab qolish va kuchaytirish maqsadida hamkorlikni faollashtirishga kelishib oldilar, deb xabar beradi Investitsiyalar va tashqi savdo vazirligi matbuot xizmati.