Ukraina Turkiyaga 2025-yilda mamlakatni qayta tiklash bo'yicha loyihalar jamlanmasini topshirdi, ularni amalga oshirish uchun tenderlar aprel-may oylarida e'lon qilinadi, deb xabar berdi hukumatparast Türkiye gazetasi manbalarga tayanib.
Avvalroq Turkiya Prezidenti Rejep Tayyip Erdog'an turk kompaniyalari Ukrainani mojaro oqibatida yuzaga kelgan vayronagarchiliklarni bartaraf etish va qayta qurishda qo'llab-quvvatlashga tayyorligini ma'lum qilgandi.
“Urush paytida ayrim hududlari katta jabr ko'rgan Ukrainani qayta tiklash bo'yicha aloqalar tezlashdi. Ukraina Turkiya tomoniga 2025-yilga mo'ljallangan loyihalar jamlanmasini topshirgan bo'lsa, aprel va may oylarida shoshilinch loyihalar bo'yicha tenderlar e'lon qilinadi”, deb yozadi nashr.
Qayd etilishicha, avtomobil yo'llaridagi mavjud bojxona postlarini yangilash, yangilarini qurish, pullik avtomagistrallarning umumdavlat tizimini yaratish asosiy ustuvor yo'nalish hisoblanadi, deb xabar beradi ria.ru.
“Ma'lum bo'lishicha, hujjatlar jamlanmasiga energetika va energiya samaradorligi, ijtimoiy uy-joy va suv ta'minoti sohalaridagi loyihalar kiritilgan”, deyiladi gazeta xabarida.
