Oʻzbekiston hududi boʻyicha may oyi birinchi oʻn kunligining katta qismida asosan juda iliq va quruq ob-havo boʻlishi kutilmoqda.

Kunduz kunlari havo 1-2-mayda 28-30 darajagacha isiydi, 3-7-mayda 34-37 darajagacha koʻtariladi.

1-2-may kunlari Fargʻona vodiysi viloyatlarida baʼzi joylarda qisqa muddatli momaqaldiroqli yomgʻir yogʻadi, respublikaning togʻ oldi va togʻli hududlarida yomgʻir yogʻadi, baʼzi joylarda kuchli boʻladi, momaqaldiroq kuzatilishi mumkin.

Respublikaning qolgan hududlarida 1-7-may kunlari yogʻingarchilik kutilmaydi.

Birinchi oʻn kunlikning oxirida harorat foni biroz pasayadi, ayrim joylarda qisqa muddatli yomgʻir yogʻishi, momaqaldiroq kuzatilishi mumkin.

Keyinchalik, may oyining oxirigacha, harorat kechalari 17-22 darajadan 10-15 darajagacha, kunduz kunlari 32-37 darajadan 25-30 darajagacha oʻzgarib turadi.

Ikkinchi va uchinchi oʻn kunliklarning ayrim kunlarida respublika boʻyicha baʼzi joylarda qisqa muddatli momaqaldiroqli yomgʻirlar yogʻadi, baʼzi joylarda jala xususiyatga ega boʻlgan mahalliy yomgʻirlar yogʻadi. Hatto bir shahar doirasida ham may oyi yomgʻirlari bir hududda kuchli yomgʻir yogʻishi va shaharning boshqa chekkasida esa u deyarli sezilmasligi mumkin.

2025-yil may oyida oʻrtacha oylik harorat iqlimiy meʼyor atrofida, baʼzi joylarda undan 1-2 darajaga yuqori boʻlishi kutilmoqda.