Bu borada “Oʻzbekneftgaz” AJ Boshqaruvi raisi Mehriddin Abdullayev topshirigʻi bilan ishlarni yana-da jadallashtirish rejalashtirilgan boʻlib oqova suvlarni tozalash inshootlarini modernizatsiya qilish, qayta qurish va yangi zamonaviy inshootlarni barpo etish yoʻli bilan suvni tejashga erishish maqsadi qoʻyilgan.
Xususan, “Oʻzbekiston GTL” MCHJ zavodida eng zamonaviy soatiga 500 kub metr quvvatga ega oqova suvlarni tozalash inshootini qurish ishlari olib borilmoqda. Hosil boʻladigan mineralizatsiyalashgan, yogʻli, ifloslangan yuza suvlari va maishiy oqova suvlarni tozalash uch bosqichda olib boriladi.
Birinchi bosqichda hosil boʻlgan mineralizatsiyalashgan oqova suvlari bugʻlantiruvchi (isparitel) kristalizator qurilmasida tuzsizlantirilib, yuqori konsentratsiyali kub qoldiqlari suvsizlantiriladi.
Ikkinchi va uchinchi bosqichda aynan tozalash inshootida ketma-ketlik bilan amalga oshiriladi. Bu yerda tozalash ishlari hozirgi kundagi zamonaviy qurilmalar orqali mexanik, fizik-kimyoviy, biologik usullar orqali amalga oshiriladi va oxirida tozalash samarasi eng yuqori boʻlgan membranali bioreaktor qurilmasida amalga oshiriladi. Tozalangan oqova suvlari toʻliq qayta texnologiyaga ishlatish uchun yuboriladi, deb xabar beradi “Oʻzbekneftgaz” AJ matbuot xizmati.