Xitoy Taʼlim vazirligi tomonidan 10-oktabr kuni eʼlon qilingan “2023-yilgi taʼlimni rivojlantirish boʻyicha statistik hisobot”ga koʻra, 2023-yilda mamlakatda 274.400 ta bolalar bogʻchasi roʻyxatga olingan boʻlib, oʻtgan yilga nisbatan 14.808 taga, yaʼni 5,12 foizga kamaygan. Shuningdek, maktabgacha taʼlim oluvchilar soni 40,93 million nafarga yetib, oʻtgan yilga nisbatan 5,35 million bolaga yoki 11,55 foizga kamaygan.

Tencent News agentligi maʼlumotlariga koʻra, Xitoyda bolalar bogʻchalari va maktabgacha taʼlim oluvchilar sonining qisqarishi nafaqat 2023-yilda, balki undan ham ertaroq boshlangan.

“2022-yilgi milliy taʼlimni rivojlantirish boʻyicha statistik hisobot“ maʼlumotlariga koʻra, 2022-yilda Xitoyda jami 289,200 ta bolalar bogʻchalari mavjud boʻlib, oʻtgan yilga nisbatan 5,610 ta bolalar bogʻchalari, yaʼni 1,90 foizga kamaygan. Maktabgacha yoshdagi bolalar soni 46,28 million nafarni tashkil etdi, bu oʻtgan yilga nisbatan 1,78 million bolaga, yaʼni 3,70 foizga kamaydi.

Avvalroq Lianhe Zaobao soʻnggi yillarda Xitoyda tugʻilish darajasining pasayishi bolalar bogʻchasiga boradigan bolalar sonining keskin kamayishiga sabab boʻlganini maʼlum qilgandi.

Tarixga nazar tashlaydigan boʻlsak, ikki bola siyosati joriy etilgandan soʻng, 2016 va 2017-yillarda tugʻilish koeffitsiyenti 17 milliondan oshdi, ayniqsa, 2016-yilda bu koʻrsatkich 18,83 millionga yetdi. Biroq 2018-yilda bu koʻrsatkich pasayishni boshladi: oʻsha yili 15,23 million, 2019-yilda 14,65 million, 2020-yilda 12 million bola tugʻilgan.

Bundan tashqari, 2021-yilda Xitoyda 10,62 million bola tugʻiladi, 2022-yilda bu koʻrsatkich 9,56 million, 2023-yilda esa 9,02 millionni tashkil etadi. Kelajakda bolalar bogʻchalariga qamrab olish koʻrsatkichlari pasayishda davom etishi taxmin qilinmoqda.

Tugʻilishning kamayishi, oʻz navbatida, Xitoydagi bir qator shifoxonalarning akusherlik xizmatiga taʼsir qildi.