Xitoylik olimlar karbonat angidridni samarali tarzda murakkab uglevodlarga, xususan shakar, fruktoza, glyukoza va oziq-ovqat va kimyo sanoati uchun mos keladigan boshqa organik moddalarga aylantirishni o'rganishdi. South China Morning Post nashrining yozishicha, bu texnologiya nafaqat issiqxona chiqindilarini kamaytirishga yordam beradi, balki oziq-ovqat xavfsizligi muammosini ham hal qiladi.

Ishlanma ustida Xitoy Fanlar akademiyasi Tyanszin sanoat biotexnologiyalari instituti mutaxassislari ish olib bordi. Tadqiqotchilar CO2 dan murakkab uglevodlarni sintez qilishning oddiy va samarali usulini topishga muvaffaq bo'lishdi, avvallari 12 dan ortiq uglerod atomiga ega bo'lgan molekulyar zanjirlarning murakkabligi tufayli bu deyarli imkonsiz ish hisoblangan.

Taklif etilayotgan jarayonda olimlar avvalo katalitik reaksiyalar yordamida CO2 dan metanolni sintez qiladi, so'ngra uning asosida fruktoza, amiloza, amilopektin, sellobioza va sellooligosaxaridlar kabi birikmalarni oladi. Konversiya samaradorligi 86 foizga yetadi va qisqa reaksiyalar zanjiri energiya xarajatlarini sezilarli darajada kamaytiradi.

Shakarqamish yoki lavlagi yetishtirish uchun qulay iqlim sharoitiga qaramay, Xitoy har yili 5 million tonnaga yaqin shakar import qiladi, bu uning umumiy iste'molining uchdan bir qismidir. ekin maydonlarini kengaytirish tuproqning degradatsiyasiga va ekotizimga qo'shimcha stressga olib kelishi mumkin. Shunday ekan, shakarni “havodan” yaratish mamlakat uchun strategik muhim yechim bo'lardi.

Hozirda texnologiya laboratoriyada muvaffaqiyatli sinovdan o'tkazildi va xitoylik olimlar uni tijorat ishlab chiqarish darajasiga olib chiqishni rejalashtirmoqda, deb xabar beradi korrespondent.net.