Xotin-qizlar sporti: Zominda ayollar futbol jamoasiga asos solindi

Sport 12 may 2021, 14:59 3 078

Soʼnggi yillarda Jizzax viloyatida xotin-qizlar sportini rivojlantirish, ular orasida sogʼlom turmush tarzini keng targʼib etishga alohida eʼtibor qaratilmoqda. Shu jumladan, hududda ayollar futboliga boʼlgan eʼtibor yanada oshib bormoqda. Buni “Soʼgʼdiyona-Women” jamoasi misolida ham koʼrish mumkin. Ishonamizki, Zomin tumanida yangi tashkil etilgan jamoa qizlari orasidan ham nafaqat viloyat, balki Oʼzbekistonimiz sharafini munosib himoya qiladigan isteʼdodli futbolchi qizlar yetishib chiqadi.

Jamoa yaqinda tashkil topganligi bois hali unga nom berilmagan, ehtimol jamoa “Zomin- Women” nomi bilan atalishi mumkin, biroq buni vaqt koʼrsatadi.

Murabbiy Nilufar Qurbonova boshchiligidagi jamoa qizlari kecha Zomin tumanidagi umumtaʼlim maktablaridan saralab olingan futbolga qiziquvchi qizlardan iborat terma jamoaga qarshi oʼrtoqlik uchrashuvida ham maydonga tushdi va 2:1 hisobida gʼalaba qozondi.

Uchrashuv yakunida Jizzax viloyati futbol assotsiatsiyasi texnik direktori, OFK va OʼFА instruktori Zoyir Hasanov hamda Jizzax viloyati futbol assotsiatsiyasi bolalar va oʼsmirlar, ommaviy futbol, ayollar, plyaj va futzal, faxriylar futboli boʼyicha mutaxassis Feruzbek Gʼanievlar qizlar bilan uchrashib, ularning kelajakdagi faoliyatlariga ulkan zafarlar tiladi.