Bu haqda Prezidentning “Kasbiy taʼlim tizimida islohotlarni amalga oshirish chora-tadbirlari toʻgʻrisida”gi (PQ–316-son) qarorida belgilangan.

Qarorga muvofiq, 2026-yildan boshlab maktabgacha taʼlim muassasalaridan boshlab oʻquvchilarni kasb tanlashga yoʻnaltirish tizimi joriy etiladi.

5 yoshdan “Atrofimizdagi kasblar” oʻyinlari, 1–4-sinflarda “Kasblar alifbosi”, 5–6-sinflarda “Kasblar olami”, 7–9-sinflarda esa “Mening kelajakdagi kasbim” fanlari joriy qilinadi.

2028-yildan 9-sinf yakuniy imtihonlari natijasiga koʻra oʻquvchilar texnikumlarga yoʻnaltiriladi.

2026-yildan ishlab chiqarish taʼlimi ustalarining maoshi birinchi malaka toifasiga ega oʻqituvchilar darajasiga tenglashtiriladi.

Har bir ustaga 20 nafar oʻquvchidan ortiq boʻlmasligi belgilandi. Texnikum direktorlariga ustalar uchun ajratilgan ish haqi fondi doirasida EKOIHning 15 baravarigacha oylik belgilash vakolati beriladi.

Har yili eng yaxshi 50 nafar usta va oʻqituvchi xorijda malaka oshiradi.

Dual taʼlimda tahsil olayotgan oʻquvchilarga har oy bazaviy hisoblash miqdorining (BHM) 1 baravari miqdorida stipendiya toʻlanadi. Ushbu davr mehnat stajiga qoʻshiladi. Dual taʼlimni tashkil etgan ish beruvchilarga 7-yil muddatga 5 milliard soʻmgacha imtiyozli kredit beriladi.

2026-yildan boshlab Prezident sovrini uchun “Kasbiy mahorat milliy tanlovi” oʻtkaziladi. Milliy reytingda eng yuqori 50 talikka kirgan texnikumlarning har biri BHMning 3000 baravari miqdorida ragʻbatlantiriladi.

2030-yilgacha texnikumlarni tugatish, ularning yer maydonlari va binolarini xususiylashtirishga moratoriy eʼlon qilinadi.

2026-yil 1-sentyabrdan 9-sinf bitiruvchilari texnikumlarda toʻliq davlat byudjeti hisobidan oʻqiydi, 11-sinfni bitirgan talabgorlar esa toʻlov-kontrakt asosida tahsil oladi.