"Hammangiz xabardorsiz, oʻtgan yili saylovoldi dasturi doirasida hududlarga tashriflarda “Inson qadri uchun” tamoyilini barcha islohotlarimizning bosh mezoni sifatida belgiladik.
“Davlat – inson uchun” degan ezgu gʻoyani hayotga tatbiq etish maqsadida 2022–2026-yillarga moʻljallangan Yangi Oʻzbekistonning taraqqiyot strategiyasini bevosita xalqimiz bilan maslahatlashib, odamlarimizning fikr va takliflari asosida ishlab chiqdik. Ushbu strategiyada:
- yaqin va oʻrta istiqbolda Oʻzbekistonning taraqqiyot tendensiyalari qanday boʻladi?
- kelgusidagi faoliyatimizni belgilaydigan aynan qaysi maqsad va vazifalar biz uchun eng dolzarb va ustuvor hisoblanadi?
- davlat va jamiyat hayotining barcha jabha va yoʻnalishlarini kompleks rivojlantirish uchun asosiy eʼtiborni nimalarga qaratishimiz kerak?
- keyingi yillarda qabul qilingan qonun va qarorlarimiz, dastur va rejalarimizni yangi davrda qanday davom ettirishimiz, ularga qanday qoʻshimcha va oʻzgartirishlar kiritishimiz kerak, degan savollarga chuqur va atroflicha javob berilgan".
