Qarorga koʻra, 2024-yil 1-apreldan 2024-yil 1-oktyabrgacha Yuk va yoʻlovchilarni tashishda avtotransportlarga yoʻl varaqalarini elektron rasmiylashtirish va yuritish tizimini joriy etish boʻyicha tajriba-sinov loyihasi amalga oshiriladi.
Bu davrda:
- elektron yoʻl varaqalari Transport vazirligining “Uztrans” yagona interaktiv axborot tizimining “Elektron yoʻl varaqa” avtomatlashtirilgan axborot tizimi orqali rasmiylashtiriladi va yuritiladi;
- elektron yoʻl varaqalari avtomobilda yuk va yoʻlovchi tashish faoliyati bilan shugʻullanuvchi yuridik shaxslar tomonidan mustaqil rasmiylashtiriladi;
- yoʻl varaqalarining qogʻoz shaklidan foydalanishni cheklamagan holda uning elektron koʻrinishiga bosqichma-bosqich oʻtiladi;
- elektron yoʻl varaqalari tizimi shaxsiy yengil avtomobilida yoʻnalishsiz taksi sifatida yoʻlovchilarni tashish bilan shugʻullanuvchi jismoniy shaxslar uchun amal qilmaydi;
- mazkur tizim platformasini yaratish, joriy etish va unga xizmat koʻrsatish uchun manfaatdor tashkilotlar (milliy operatorlar) tanlov asosida jalb etilishi mumkin;
- tizimdan foydalanganlik uchun yigʻim undirilmaydi.
Avtomobilda yuk va yoʻlovchi tashish bilan shugʻullanuvchi yuridik shaxslar uchun elektron yoʻl varaqalari tizimi platformasi joriy etilishi nazarda tutilgan.
