Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Atabekovning maʼlum qilishicha, ijtimoiy tarmoqlarda tarqalayotgan ushbu xabarlar haqiqatga mutlaqo toʻgʻri kelmaydi. Ayni paytda esa yurtimizda mavsumiy respirator kasalliklar tarqalishi bilan bogʻliq vaziyat barqaror va xavotirlanishga hech qanday asos yoʻq.
Mutaxassisning taʼkidlashicha, havo-tomchi yoʻli orqali yuqadigan oʻtkir respirator virusli infeksiyalar mavsumiy xarakterga ega boʻlib, ularning koʻtarilish davri kuz-qish va qish-bahor oylariga toʻgʻri keladi. Bundan esa zinhor xavotirga tushish kerak emas.
Bir necha kun avval mamlakatimizda qish mavsumiga xos boʻlmagan iliq ob-havo kuzatildi. Kecha esa, aksincha, hududlarda qor yogʻib oʻtdi. Albatta, havoning bunday tez-tez oʻzgaruvchanligi bois aksariyat insonlar mavsumga mos kiyinishga yetarlicha eʼtibor qaratmaydi. Qolaversa, bunday iqlim sharoitida xonadonlar va yopiq bino-inshootlarda havo almashinuvi kamayishi hisobiga atmosferada viruslar konsentratsiyasi oshishi kuzatiladi.
“Bilamizki, respirator xastaliklarni keltirib chiqaradigan viruslarning turlari juda koʻp. Gripp, paragripp, renovirus, adenovirus, hatto, koronavirus infeksiyalari shular jumlasidan. Shu sababli hozir kuzatilayotgan oʻtkir respirator virusli infeksiyalarni tabiiy holat, deb qabul qilish zarur, — deydi Nurmat Atabekov.
Mutaxassis immunitet mustahkamligini taʼminlash uchun meva-sabzavotlar, turli koʻkatlar va qaynatmalar isteʼmol qilish hamda mavsumga mos kiyinishni tavsiya etdi va mavsumiy respirator kasalliklar tarqalishining oldini olishga eʼtiborli boʻlishga chaqirdi.
