Атап өтилгениндей, жаңа редакциядағы Конституция мәмлекетимизде миллий ҳәм улыўмаинсаныйлық қәдириятлар, мәмлекетшилигимиз раўажланыўының тарийхый тәжирийбесине тийкарланған мәмлекетлик ҳәкимият ҳәм басқарыўдың нәтийжели системасын жаратпақта. Мәмлекетлик ҳәкимияттың шөлкемлестирилиўи, атап айтқанда, Өзбекстан Республикасы Олий Мажлиси, Өзбекстан Республикасы Президенти, Министрлер Кабинети ҳәм жергиликли мәмлекетлик ҳәкимияттың тийкарлары айрықша бапларда толық баян етилген.

Конституцияның Өзбекстан Республикасы Президенти ҳаққындағы XIX бабында Президенттиң мәмлекет ҳәкимияты уйымларының келисилген ҳалда ислеўин ҳәм өз-ара бирге ислесиўин тәмийинлеўши мәмлекет басшысы сыпатындағы статусы, мәмлекетти басқарыў ҳәм раўажландырыўды тәмийинлеўдеги әҳмийетли ўәкилликлери беккемлеп қойылған.

Сондай-ақ, Өзбекстан Республикасы Президенти өз ўәкилликлериниң әмелге асырылыўын шөлкемлестириўшилик, ҳуқықый ҳәм аналитикалық жақтан тәмийинлеў мақсетинде Өзбекстан Республикасы Президенти Администрациясын қәлиплестириўи, Президент Администрациясының ҳуқықый статусы, тийкарғы ўазыйпалары, жумысын шөлкемлестириў тәртиби ҳәм ўәкилликлери нызам менен белгиленетуғыны нәзерде тутылмақта.

Бул нызам Өзбекстан Республикасы Конституциясының талапларынан келип шығып ислеп шығылған ҳәм Президент Администрациясының мәмлекетлик басқарыў системасындағы орнын, ҳуқықый статусын ҳәм жумысының тийкарғы бағдарларын конституциялық нызам дәрежесинде белгилеўге қаратылған.

Нызам менен Администрацияның статусы, жумысының тийкарғы принциплери, структурасы ҳәм жумысын шөлкемлестириў тәртиби, мәмлекетлик уйымлар ҳәм шөлкемлер менен байланыслары, лаўазымлы шахслар, Администрация басшылары ҳәм хызметкерлери жумысының кепилликлери анық белгилеп берилмекте.

Буннан тысқары, Администрацияның мәмлекетлик уйымлар ҳәм шөлкемлер менен өз-ара бирге ислесиўи ҳәм байланыслары ҳуқықый жақтан тәртипке салынады.

Нызамды таярлаў процесинде бир қатар сырт еллер, атап айтқанда, АҚШ, Финляндия, Чехия, Словакия, Румыния, Латвия, Қазақстан ҳәм басқа да мәмлекетлердиң тәжирийбеси үйренилип, талланды.

Нызамды мақуллаў процесслери Сенаттың рәсмий интернет платформалары арқалы тиккелей сәўлелендирип барылды ҳәм сенаторлар тәрепинен кеңнен додаланды.

Сенаторлардың пикиринше, Конституциялық нызамның қабыл етилиўи Президент жумысын шөлкемлестириў, ҳуқықый ҳәм аналитикалық жақтан тәмийинлеўдиң ҳуқықый механизмлерин жетилистириўге, мәмлекетлик уйымлардың өз-ара бирге ислесиўин беккемлеўге ҳәм басқарыў процесслериниң нәтийжелилигин арттырыўға хызмет етеди.

Додалаў жуўмағында нызам сенаторлар тәрепинен мақулланды.