Өзбекстан энергетика министри Ж.Мирзамаҳмудов ҳәм ҚХР Мәмлекетлик энергетика басқармасының баслығы Ван Хунчжи басшылығында өткен ушырасыўда еки мәмлекеттиң тийисли министрликлери ҳәм уйымлары, сондай-ақ, ири энергетика компанияларының ўәкиллери қатнасты.

Жоқары дәрежеде ерисилген стратегиялық келисимлерди әмелге асырыў шеңберинде Өзбекстан менен Қытайдың энергетика тараўындағы бирге ислесиўи сапа жағынан жаңа басқышқа көтерилгени атап өтилди. Тәреплер нефть-газ тармағы, электр энергетикасы ҳәм қайта тиклениўши энергия дәреклери тараўларындағы жойбарларды биргеликте әмелге асырыў саўда-экономикалық шерикликти беккемлеўдиң әҳмийетли факторы екенин атап өтти.

Сөйлесиўлерде углеводород кәнлерин өзлестириў перспективалары, жер асты газ сақлағышларын қурыў ҳәм магистраль газ инфраструктурасын модернизациялаў мәселелерине айрықша итибар қаратылды. Сондай-ақ, Қытайдың алдынғы технологияларынан пайдаланған ҳалда қуяш ҳәм самал электр станцияларын қурыў, энергетика системаларының өз-ара байланыслылығын раўажландырыў, тараў ушын маман кадрлар таярлаў жойбарлары додаланды.

Ушырасыў жуўмағында тәреплер энергетика объектлерин санластырыў, тараўды стандартластырыў ҳәм инфраструктураны басқарыўға заманагөй көзқарасларды енгизиў бойынша тәжирийбе алмасыўды даўам еттириўге келисип алды. Киши комитеттиң гезектеги мәжилисин Қытай Халық Республикасында өткериў режелестирилген.