Самарқандта Социаллық қорғаў миллий агентлигиниң Балаларды қоллап-қуўатлаў ҳәм социаллық интеграциялаў орайы жанында "Нажот" орайы шөлкемлестириледи. Ол юридикалық шахсты дүзбестен жумыс алып барады. Оның жумысын шөлкемлестириў ушын 4 штат ажыратылыўы, зәрүр жағдайларда психолог, психиатр, арнаўлы педагог, реабилитолог ҳәм басқа да қәнигелер тартылыўы нәзерде тутылған.
20-октябрьден баслап орайдың қәнигелестирилген ханаларында жас өспирим жәбирлениўшилерди сораўдан өткериў, экспертизалар ушын үлгилер алыў, көбирек жынысый зорлық ҳәм балаларды эксплуатациялаў менен байланыслы айырым категориядағы жынаятлар бойынша таныў ҳәм басқа да процессуаллық ҳәрекетлер әмелге асырылады. Жаңалық Самарқанд ўәлаяты аймағында жүз берген жынаятларға қолланылады.
Процессуал ҳәрекетлер арнаўлы таярланған прокуратура хызметкери тәрепинен орай психологының жуўмағын есапқа алған ҳалда әмелге асырылыўы керек. Сондай-ақ, онда баланың нызамлы ўәкили, адвокаты, тергеўши, экспертлер, социаллық хызметкер ҳәм психолог қатнасады.
Барлық ҳәрекетлер мәжбүрий түрде аудио ҳәм видео жазыўға алынады. Алынған жазыўлар жынаят иси материалларына қосып қойылады ҳәм бала шақырылмастан судта пайдаланыў мүмкин болады. Онда жазыўларды орайда сақлаў, үшинши шахсларға бериў ямаса ҳәр қандай түрде тарқатыў қадаған етиледи. Сондай-ақ, жәбирлениўши баланың гүман етилиўши, айыпланыўшы, олардың жақынлары ҳәм қорғаўшылары менен баланың нызамлы ўәкилиниң қатнасыўысыз тиккелей байланысыўына жол қойылмайды.
2026-жылдың ақырына шекем ҳәр бир аймақта кеминде 10 адвокатты халықаралық стандартлар тийкарында балалар менен ислесиў бойынша арнаўлы бағдарламалар бойынша оқытыў режелестирилген. 2027-жыл 1-январьдан баслап таярланған адвокатлар жынаят иси бойынша жәбирлениўши деп табылған ямаса гүўа сыпатында тартылған балаларға мәмлекетлик юридикалық жәрдем көрсетеди.
Социаллық қорғаў миллий агентлигиниң 1246 қысқа номери бойынша күни-түни жумыс ислейтуғын исеним телефоны 112 бирден-бир диспетчерлик хызмети менен интеграцияланады. Бул мүрәжатларды оператив қабыл етиў ҳәм автоматластырылған түрде қайта көрип шығыў, сондай-ақ, тийисли мәмлекетлик уйымларға жибериў имканиятын береди.
Бундай мүрәжатларды алған уйымлар оларды нызамшылықта белгиленген мүддетлерде көрип шығып, нәтийжелери ҳаққында мүрәжат етиўши ямаса оның нызамлы ўәкилин, Социаллық қорғаў миллий агентлиги ҳәм тийисли прокурорды хабардар етиўи шәрт болады.
Ҳүжжет Нызамшылық мағлыўматлары миллий базасында жәрияланған ҳәм 15.10.2026-жылдан күшке кирген.
