Жиналыста Беларусь, Қазақстан, Қырғызстан, Ресей, Тәжікстан және Өзбекстанның туризм саласына жауапты кеңселері, сондай-ақ ТМД Атқару комитеті мен ТМД-ға мүше мемлекеттер Парламентаралық Ассамблеясы Кеңесі Хатшылығының өкілдері қатысты.

Күн тәртібіне ТМД мемлекеттеріндегі туризмді дамыту тенденциялары мен болашағы зор жобалар, 2021–2030 жылдарға арналған Туризм саласындағы ынтымақтастықты дамыту стратегиясының іске асырылуы, туристік ағындарды статистикалық есепке алу және болжау, кадрлар даярлау, сондай-ақ саладағы өзара ынтымақтастықты одан әрі кеңейту мәселелері орын  алды.

Жиналыста өзара туристік ағындар туралы статистикалық және талдамалық ақпаратты тұрақты түрде алмасу механизмін жетілдіру мәселесіне ерекше назар аударылды. Атап айтқанда, ТМД мемлекеттерінің туризм саласындағы өкілетті органдары арасында ақпарат алмасуды жолға қою және ұлттық цифрлық платформалардың ақпараттық ресурстарын интеграциялау мүмкіндіктері талқыланды.

Сонымен қатар, жиналыс аясында Самарқант қаласындағы «Жібек жолы» туризм және мәдени мұра халықаралық университетінің ТМД-ға мүше мемлекеттердің туризм саласындағы тірек  ұйымы ретіндегі қызметі жеке қарастырылды.

Осы мәселе бойынша Өзбекстан Республикасы Туризм комитеті төрағасының орынбасары Санжар Таджиев баяндама жасап, университеттің бүгінгі қызметі, халықаралық ынтымақтастығы, білім беру және ғылыми бағдарламалары, сондай-ақ ТМД мемлекеттерінің салалық жоғары оқу орындары арасындағы ынтымақтастықты дамыту бағытында атқарылып жатқан жұмыстар туралы ақпарат берді.

Күн тәртібіндегі маңызды мәселелердің бірі Кеңеске келесі төрағалықты анықтау болды. Белгіленген ротация қағидатына сәйкес, 2026–2027 жылдар кезеңінде ТМД-ға мүше мемлекеттердің Туризм бойынша кеңесіне төрағалық ету Өзбекстан Республикасына өтті және Туризм комитетінің төрағасы Абдулазиз Аққулов Кеңес төрағасы етіп белгіленді. Сонымен қатар, Кеңестің 2027 жылғы кезекті жиналысын Өзбекстан Республикасында өткізу туралы қаулы қабылданды.

Өзбекстанның Кеңестегі төрағалығы кезеңінде трансшекаралық туризмді дамытуға, туристік статистика мен талдамалық ақпарат алмасуды жетілдіруге, салаға білікті кадрлар даярлауға, білім беру мекемелері арасындағы ынтымақтастықты нығайтуға, сондай-ақ бірлескен туристік бағыттарды дамытуға ерекше назар аударылады.

Осы бағыттардағы ынтымақтастық ТМД аясында туризм саласындағы практикалық байланыстарды одан әрі кеңейтуге, өзара тәжірибе алмасуға және жаңа бірлескен бастамаларды ілгерілетуге ықпал етеді.