Бұл туралы Бәсекелестік комитеті хабарлады.
Айтылуынша, Комитетке келіп жатқан өтініштер мен әлеуметтік желілердегі пікірлерді талдауда пойыздардың кестеден кешігуіне байланысты мәселелердің өзектілігін көрсеткен. Атап айтқанда, 2025 жыл барысында бұл мәселе бойынша 51 өтініш тіркелген.
Зерттеу барысында қолданыстағы нормативтік құжаттарда тасымалдаушының кінәсінен пойыз кешіккен жағдайда өтемақы төлеу тәртібі белгіленбегені анықталған.
Осыдан кейін Бәсекелестік комитеті тұтынушылардың құқықтарын қамтамасыз ету мақсатында аталған тәртіпті енгізу жөнінде Транспорт министрлігіне сұрау жолдаған.
Министрліктің мәліметіне қарағанда, қазіргі уақытта «Өзбекстан Республикасының теміржол көлігінде жолаушыларды, багажды және жүк багажын тасымалдау қағидаларының» жаңа редакциясы әзірленіп жатыр. Осыған орай, пойыз кешіккен жағдайда төмендегі мөлшерде өтемақы төлеу ұсынылуда:
15–30 минут кешіксе — билет құнының 15 пайызы;
31–60 минут кешіксе — 25 пайызы;
61–120 минут кешіксе — 50 пайызы;
121 минуттан артық кешіксе — 100 пайызы.
Осы уақытқа дейін мұндай тәртіп тек «Афросиёб» пойыздарына қатысты қолданылып келген болса, жаңа өзгерістер оны барлық жергілікті (қалыпты және жедел) пойыздарға қолдануды көздейді.
Бәсекелестік комитеті бұл бастаманы тұтынушылардың құқықтарын қорғау және теміржол қызметтерінің сапасын арттыру жолындағы маңызды қадам ретінде бағалап отыр.
