Маълум қилинишича, учрашув соат 22:00 да бошланиши муносабати билан пойтахтнинг турли ҳудудларида футбол мухлислари ҳаракати сезиларли даражада ортиши кутилмоқда.

Шу боис йўловчилар учун қўшимча қулайлик яратиш ва жамоат транспортининг узлуксиз фаолиятини таъминлаш мақсадида метро поездлари ҳаракати бир соатга узайтирилади.

Шунга кўра, 23 июнь куни Тошкент метрополитени йўловчиларга тунги соат 01:00 гача хизмат кўрсатади.

Қўшимча иш режими футбол мухлисларининг учрашувдан сўнг ўз манзилларига хавфсиз, қулай ва тез етиб боришлари учун ташкил этилмоқда.

Метрополитен маъмурияти йўловчилардан сафарларини олдиндан режалаштиришларини ҳамда метро хизматларидан фойдаланишда белгиланган хавфсизлик қоидаларига қатъий риоя қилишларини сўради.

Шунингдек, «Тошкент метрополитени» жамоаси Ўзбекистон миллий терма жамоасига бўлажак учрашувда омад ва муваффақият тилаб, барча мухлисларни жамоани биргаликда қўллаб-қувватлашга чақирди.