Вилоят ИИБ маълумотига кўра, воқеа 9 август куни содир бўлган. 1987 йилда туғилган Т.У. «Дамас» автомашинасида ҳаракатланиб кетаётганида хизмат олиб бораётган ЙПХ ходимларини кўриб, йўналишини ўзгартирган ва қочишга уринган.

ЙПХ ходимлари автомобилни кузатиб борган. Ҳайдовчи «Илғор» маҳалласидаги уйи яқинида машинадан тушиб қочмоқчи бўлганида ходимлар томонидан тўхтатилган. Ундан спиртли ичимлик ҳиди келгани сабабли тиббий кўрикдан ўтказиш учун олиб кетишга ҳаракат қилинган.

Шу пайт воқеа жойига ҳайдовчининг икки укаси, турмуш ўртоғи ва қўшниси етиб келган. Улар хизмат вазифасини бажараётган ички ишлар органлари ходимларига фаол қаршилик кўрсатиб, икки нафар ЙПХ ходимига тан жароҳати етказган.

Ҳолат юзасидан Ангор тумани прокуратураси ва ИИБ тезкор-тергов гуруҳи томонидан ўрганиш ўтказилиб, шу куни фуқароларга нисбатан Жиноят кодексининг 219-моддаси 2-қисми билан жиноят иши қўзғатилган.

Шунингдек, ЙПХ ходимларининг хатти-ҳаракатлари юзасидан ҳам хизмат текшируви ўтказилмоқда. Унинг натижалари бўйича қўшимча маълумот берилиши айтилган.