Ички ишлар вазирлиги Кибержиноятларга қарши курашиш департаменти ходимлари томонидан Тошкент шаҳрининг Бектемир туманида ўтказилган тезкор тадбир давомида мазкур фирибгарлик ҳолати фош этилди.
Аниқланишича, 2000 йилда туғилган Сардор ва унинг 1997 йилда туғилган шериги Хуршид OLX.UZ ва Telegram платформаларида ўзларини уй эгаси ёки риелтор сифатида таништириб, ижарага бериладиган уй-жойлар ҳақида сохта эълонлар жойлаштирган. Улар уйларни бозор нархидан анча арзон нархларда таклиф қилиб, қизиқиш билдирган фуқаролардан олдиндан тўлов сифатида пул маблағларини олган. Шундан сўнг эса алоқани узиб, ғойиб бўлган.
Тезкор-қидирув тадбирлари давомида ушбу жиноятларни икки шахс ўзаро тил бириктирган ҳолда содир этгани аниқланган.
Тинтув тадбирида жиноятга алоқадорлиги аниқланган саккизта телефон аппарати, 15 та SIM-карта ва 16 та банк картаси ашёвий далил сифатида олинди.
Ҳозирда гумонланувчиларга нисбатан Жиноят кодексининг 168-моддаси 3-қисми билан жиноят иши қўзғатилиб, тергов ҳаракатлари олиб борилмоқда.
Ҳуқуқни муҳофаза қилувчи органлар фуқароларни ижтимоий тармоқлардаги нотаниш шахслар, айниқса, уй-жойларни бозор нархидан анча арзон нархларда ижарага беришни таклиф қилаётган шубҳали воситачиларга ишонмасликка чақирди.
