Бу ҳақда Ўзбекистон мусулмонлари идораси Матбуот хизмати маълум қилди.

Қайд этилишича, зиёратчилар Тошкент, Наманган, Фарғона, Андижон, Самарқанд, Бухоро, Қарши, Термиз ва Урганч шаҳарларидаги аэропортлардан Мадина шаҳрига тўғридан-тўғри учиб боради.

Ҳожиларни Мадинага етказиш Саудия Арабистонининг FlyAdeal авиакомпанияси томонидан амалга оширилади, уларни Ўзбекистонга қайтариш эса Uzbekistan Airways зиммасига юклатилган.

Айни пайтда ҳаж тадбирларини юқори савияда ташкил этиш учун тайёргарлик ишлари якунланмоқда. Жумладан, зиёратчилар тиббий кўрикдан ўтказилиб, менингитга қарши эмланди, ҳаж визалари ва барча зарур ҳужжатлар расмийлаштирилди. Шунингдек, ҳар бир гуруҳга раҳбарлар бириктирилиб, сафар олди машғулотлари ўтказилмоқда.

Зиёратчилар учун махсус тўпламлар ҳам тайёрланган бўлиб, уларга қўлланма, сумка, нимча, термос, соябон, сим-карта ва қувватлагич тақдим этилмоқда.

Шу билан бирга, Саудия Арабистонида бўлиб турган ишчи гуруҳлар меҳмонхоналар ҳамда Мино ва Арофот ҳудудларида ҳожилар учун муносиб шароитларни яратиш устида иш олиб бормоқда.

Ўзбекистон мусулмонлари идораси Ҳаж амаллари бўйича тушунтиришлар ва тавсияларни ўзининг расмий ахборот манбалари орқали эълон қилиб бормоқда.