Талабгорлар ҳужжатларини my.edu.uz платформаси орқали бугун кун якунига қадар топширишлари мумкин.
Хабарингиз бор, 2026/2027-ўқув йилида иккинчи ва ундан кейинги олий таълим учун талабгорларни онлайн рўйхатдан ўтказиш 10 июлдан бошланган эди. Ҳужжат топшириш жараёни бугун, 10 август куни якунланади. 10 август соат 09:35 ҳолатига кўра, 25 373 нафар талабгор ариза топширган.
Амалдаги тартибга кўра, олий маълумотга эга бўлган фуқаролар бакалавриат таълим йўналишлари бўйича иккинчи ва ундан кейинги олий таълимни олиш учун ўқишга қабул қилиниши мумкин.
Номзодлар my.edu.uz платформасида:
— паспорт ва ЖШШИР маълумотларини киритади;
— диплом ва унинг иловасининг электрон нусхасини юклайди;
— ўқиш истагидаги олий таълим муассасаси ва таълим йўналишини танлайди.
Иккинчи ва ундан кейинги олий таълимга қабулда фуқаронинг биринчи бакалавр дипломи бўйича олган мутахассислиги чеклов сифатида белгиланмаган.
Яъни, биринчи олий маълумотини бир йўналишда олган фуқаро иккинчи мутахассислик учун бошқа йўналишни танлаши мумкин. Масалан, математика йўналишини тамомлаган шахс иккинчи олий таълим учун биология, иқтисодиёт ёки филология каби бошқа йўналишларга ҳужжат топшириши мумкин.
Бунда иккинчи ва ундан кейинги олий таълим тўлиқ тўлов-контракт асосида амалга оширилади.
Иккинчи мутахассислик бўйича қабул квоталари ОТМнинг илмий-педагогик салоҳияти ва моддий-техник базасидан келиб чиқиб, олий таълим муассасасининг Кенгаши томонидан мустақил белгиланади.
Иккинчи ва ундан кейинги олий таълимга қабул натижалари олий таълим муассасалари томонидан 30 августга қадар эълон қилинади.
