Хусусан, у Бобур шаҳри ҳудудидаги давлат захирасида бўлган 20 сотих ер майдонини ваколатли мансабдор танишлари орқали аукционга қўйдириб, сўнгра ютиб бериш ҳамда мазкур фуқаро номига расмийлаштириб, келгусида бу жойда қурилиш ишлари амалга ошириши учун рухсатнома олиб бериш эвазига 50 минг АҚШ доллари талаб қилади.

Давлат хавфсизлик хизмати ходимлари томонидан ўтказилган тезкор тадбирда вилоят ҳокими ўринбосари сўралган пул маблағини ўзининг яшаш хонадонида олган вақтида ашёвий далиллар билан ушланди.

Наманган вилоятида қайд этилган ҳолатда эса, Наманган тумани Қурилиш ва уй-жой коммунал хўжалиги бўлими бош архитектори маҳаллий оилавий корхона раҳбари томонидан ўз яшаш хонадонининг бир қисмида қурилган автомобиллар ювиш шохобчасининг лойиҳа ҳужжатларини расмийлаштириб бериш ҳамда уни тасарруф этиш бўйича қўйилган тақиқни бекор қилиб бериш эвазига 1500 АҚШ доллари талаб қилади.

Шунингдек, жорий йилнинг 1 апрель куни у 500 АҚШ долларини олиб, қолган қисмини тезлаштириб беришини сўрайди.

Давлат хавфсизлик хизмати ва Бош прокуратура ҳузуридаги Департамент ходимлари ҳамкорлигида ўтказилган тезкор тадбирда мансабдор шахс 1000 АҚШ долларини тамагирлик йўли билан ўз хизмат хонасида олган вақтида ушланди.

Таъкидлаш лозимки, оилавий корхона раҳбари автомобиллар ювиш шохобчасини лойиҳа ҳужжатларисиз қурганлиги юзасидан 2025 йилнинг декабрь ойида бош архитектор томонидан тузилган далолатнома асосида суд тайинлаган 43 млн 300 минг сўм миқдоридаги жаримани тўлаган.

Лекин, шунга қарамай, бош архитектор унга қонуний ечим кўрсатмай, аксинча коррупцион ҳаракатларни амалга оширган.

Бу каби қонунбузилиши Фарғона вилоятида ҳам кузатилди. Жумладан, Қўштепа тумани Камбағалликни қисқартириш ва бандликка кўмаклашиш бўлими бошлиғи ўринбосари ўз хизмат мавқейидан фойдаланган ҳолда 1999 й.т. маҳаллий фуқаронинг ишончига кириб, юқори лавозимда ишловчи танишлари орқали, уни Андижон вилоятидаги олий таълим муассасаларидан бирининг сиртқи йўналишига ўқишга киритиб қўйиш эвазига 2 минг АҚШ доллари олган вақтида Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ашёвий далиллар билан ушланди.

Ҳозирда ҳар учала ҳолат юзасидан қонунбузарларга нисбатан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.