— Албатта, бизда босим йўқ. Шу сабабли эртага Португалияга қараганда бизга осонроқ бўлади, деб ўйлайман. Бизда ажойиб жамоа шаклланган. Биринчи ўйиндан кейин ўзимизга бўлган ишонч янада ортди. Биз аллақачон дебют қилдик ва энди яхши натижа учун майдонга чиқамиз.
Шомуродов рақибнинг биринчи турдаги натижасига алоҳида эътибор қаратмаганини таъкидлади.
— Биз рақибимизнинг биринчи турдаги ўйини натижаси ҳақида ўйлаганимиз йўқ. Ҳозир буни муҳокама қилиш вақти эмас. Балки учинчи турдан кейин бу ҳақда гаплашармиз. Айни пайтда биз учун энг муҳими — эртанги учрашув.
Тажрибали ҳужумчи Колумбияга қарши баҳсдаги камчиликлардан тегишли хулоса чиқарилганини ҳам қайд этди.
— Колумбияга қарши биринчи бўлимда мураббий кўрсатмаларини тўлиқ бажара олмаганимиз сабаб айрим хатоларга йўл қўйдик. Эртага бундай хатоларни такрорламасдан, ўз ўйинимизни кўрсатишга, тўпни кўпроқ назорат қилишга ва голли вазиятлар яратишга ҳаракат қиламиз.
Шомуродов жамоадаги руҳий ҳолат ҳам яхши эканини айтди.
— Ҳаммаси яхши. Ҳаяжон бўлиши табиий, аммо майдонга чиққан дастлабки дақиқаларданоқ бу ҳис йўқолади.
Шунингдек, у жамоадоши Аббосбек Файзуллаев билан ўзаро тушуниш юқори даражада эканини таъкидлади.
— Биз Аббос билан клубда ҳам бирга ўйнаймиз, машғулотларда ҳам доимо биргамиз. Шунинг учун бир-биримизни жуда яхши тушунамиз. Энг муҳими эса бир жамоа бўлиб, яхши натижага эришиш учун бор кучимизни сарфлашдир.
