Ички ишлар вазирлиги Шахсий хавфсизлик бош бошқармаси маълумотига кўра, фуқаро ўзини ички ишлар органларининг Қўриқлаш хизмати ходими сифатида таништириб, номзодларни ишга киритиб беришни ваъда қилган.

Текширувда аниқланишича, у Қўриқлаш хизматига ишга кириш учун ҳужжат топширган, тиббий кўрикдан ўтишда муаммоси бўлган фуқаронинг ишончига кириб, уни тиббий комиссиядан ўтказиб беришни ваъда қилган. Бунинг эвазига ўз номидаги банк пластик картасига пул ўтказдириб, маблағни фирибгарлик йўли билан қўлга киритган.

Шахсий хавфсизлик бош бошқармаси ходимлари томонидан ўтказилган тезкор тадбирда гумонланувчи ашёвий далиллар билан ушланган.

Мазкур ҳолат юзасидан 2001 йилда туғилган фуқарога нисбатан Ўзбекистон Республикаси Жиноят кодексининг 168-моддаси биринчи қисми (фирибгарлик) билан жиноят иши қўзғатилган. Ҳозирда тергов ҳаракатлари давом этмоқда.

Ички ишлар вазирлиги мазкур шахснинг хатти-ҳаракатларидан жабрланган бошқа фуқаролардан 1102 ёки (71) 231-31-74 телефон рақамлари орқали мурожаат қилишни сўради. Мурожаат қилувчиларнинг шахси сир сақланиши кафолатланган.