Ижтимоий тармоқлардаги сохта кредит таклифлари фуқароларнинг маблағларидан айрилишига сабаб бўлмоқда. Фирибгарлар кам фоизли кредит ваъда қилиб, уни расмийлаштириш учун олдиндан пул ўтказишни талаб қилади. Маблағ олинганидан кейин эса кредит ажратилмайди ва фуқаролар билан алоқа узилади.
Косонсой туманида аниқланган ҳолат ҳам шундай схема билан боғлиқ. Маълум қилинишича, гумонланувчи Telegram мессенжерида «Микрокредит» номли сохта саҳифа орқали фуқароларга кам фоизли кредит таклиф қилган. Кредитни расмийлаштириш баҳонасида улардан банк карталарига олдиндан пул ўтказиш сўралган.
Таклифга ишонган фуқаролар пул ўтказганидан кейин кредит ололмаган ва улар билан алоқа узилган. Дастлабки маълумотларга кўра, ушбу ҳолат бўйича етказилган зарар 250 миллион сўмдан ортиқни ташкил этади.
Гумонланувчининг айтишича, у аввал ҳам фирибгарлик учун судланган. У қилмишидан пушаймонлигини билдириб, фуқароларнинг ишончидан фойдаланиб олган пулларини ўз эҳтиёжларига сарфлаганини тан олган.
Наманган вилояти Ички ишлар бошқармаси Кибержиноятларга қарши курашиш бошқармаси ходимлари томонидан ўтказилган тезкор-қидирув тадбирлари натижасида гумонланувчи аниқланиб, қўлга олинди.
Ҳолат юзасидан Ўзбекистон Республикаси Жиноят кодексининг 168-моддаси учинчи қисми «б» ва «в» бандлари билан жиноят иши қўзғатилган. Айни вақтда тегишли процессуал ҳаракатлар олиб борилмоқда.
