Ушбу сўров ортидан Centrum Air авиакомпанияси матбуот хизмати вазиятга ойдинлик киритувчи расмий баёнот билан чиқди.
Компаниянинг маълум қилишича, 2026 йил 19 май куни Тошкент – Урганч йўналишидаги C6089 рейси самолётини мажбурий равишда алмаштиришга тўғри келган. Бунга рейсга мўлжалланган йирик Airbus А330 самолётини чақмоқ ургани ва у ҳаво кемаси хавфсизлик нуқтаи назаридан техник кўрикка олингани сабаб бўлган.
Парвозларни жадвалдан кечиктирмаслик учун рейсга нисбатан кичикроқ сиғимли Airbus А320 самолёти ажратилган. Сиғим ўзгаргани сабабли 42 нафар йўловчи бортга сиғмай, уча олмай қолган. Авиакомпания хавфсизлик йўлида самолётни алмаштириш ҳуқуқи амалдаги Йўловчи ва багаж ташиш қоидаларида ҳамда компания шартномасининг 15-бандида кўзда тутилганини эслатиб ўтди.
Centrum Air ўша вақтнинг ўзида рейсдан қолиб кетган барча йўловчиларга икки хил ечим таклиф қилган:
Чипта пулини тўлиқ қайтариб олиш;
Энг яқин вақтдаги бошқа рейсларга (шу жумладан, бошқа авиакомпания самолётларига) бепул қайта брон қилиш.
Кутиш вақти чўзилиб кетганлар меҳмонхонага жойлаштирилган. Шунингдек, келтирилган ноқулайлик учун ҳар бир йўловчига ички рейслар учун кейинги сафарга 50% чегирмали промокод, битта бепул багаж жойи ва самолётда қулайроқ ўриндиқни бепул танлаш имконияти берилган.
Авиакомпания Рақобат қўмитасининг асосий эътирозларидан бири бўлган ортиқча чипта сотиш амалиётини қатъиян рад этди:
“Centrum Air овербукинг, яъни самолётдаги ўриндиқлардан ортиқча чипта сотиш амалиётидан мутлақо фойдаланмайди. C6089 рейсидаги ҳолат эса фақатгина кутилмаган форс-мажор сабабли юзага келди”.
Компания парвозлар кечиккан тақдирда йўловчиларга барча алоқа каналлари орқали олдиндан хабар берилиши, кутиш вақтида бепул таом ва ичимликлар, жараён узоқ чўзилса — меҳмонхона билан таъминланишини билдирди. Барча мажбуриятлар “Истеъмолчиларнинг ҳуқуқларини ҳимоя қилиш тўғрисида”ги Қонун ва Ҳаво кодексига мос равишда бажарилаётгани таъкидланди.
Centrum Air Рақобат қўмитаси ҳамда Фуқаро авиацияси агентлиги билан ҳамкорликка тайёрлигини ва текширув учун сўралган барча ҳужжатлар ҳамда статистик маълумотларни белгиланган муддатда тақдим этишини маълум қилди.
