Маълум қилинишича, Кармана туманида фаолият юритувчи «Л.» оилавий корхонаси раҳбари хизмат кўрсатиш биноси электр тармоғидан асоссиз узиб қўйилгани юзасидан Бизнес-омбудсманга мурожаат қилган.

Ўрганишлар давомида Қизилтепа туман электр тармоқлари корхонаси томонидан мазкур корхонага тегишли бинода электр таъминоти асоссиз чеклаб қўйилгани аниқланган. Бу эса тадбиркорлик фаолиятининг вақтинча тўхтаб қолишига сабаб бўлган.

Қайд этилишича, Вазирлар Маҳкамасининг 2024 йил 31 майдаги 319-сон қарори билан тасдиқланган «Электр энергиясидан фойдаланиш» қоидаларида истеъмолчини электр таъминотидан узиш ёки чеклаш учун аниқ асослар белгиланган.

Мазкур ҳолат юзасидан Бизнес-омбудсман томонидан кўрилган чоралар натижасида тадбиркорлик фаолиятига асоссиз аралашган мансабдор шахсга нисбатан Маъмурий жавобгарлик тўғрисидаги кодекснинг 241-3-моддаси асосида БҲМнинг 40 баравари миқдорида жарима жазоси қўлланилди.

Шунингдек, кўрилган чоралар натижасида оилавий корхонанинг электр таъминоти қайта тикланиб, унинг фаолиятини давом эттириши таъминланган. Соҳага масъул бошқа ходимлар билан эса келгусида бундай ҳолатларнинг олдини олиш бўйича профилактик суҳбатлар ўтказилган.