Маълум бўлишича, Қашқадарё вилояти Экология ва иқлим ўзгариши бош бошқармаси “Ў.” АЖдан 10,8 млрд сўм миқдорида компенсация тўловларини ундиришни сўраб, Қарши туманлараро иқтисодий судига даъво аризаси киритган.

Суд муҳокамасида назорат қилувчи орган текшириш предметидан ташқарига чиққани, текшириш далолатномаси эса жамият раҳбари ёки унинг вазифасини бажарувчи шахсга тақдим этилмагани аниқланган.

Шунингдек, тадбиркорлик субъекти фаолияти натижасида атмосферага метан гази сизиб чиққани ҳам далиллар билан тасдиқланмаган.

Бизнес-омбудсман вакили тақдим этган маълумотларга кўра, суд назорат қилувчи орган томонидан текширув ўтказиш тартибига оид белгиланган талаблар бузилганини инобатга олган.

Натижада суд текшириш далолатномаси ва ундаги ҳисоб-китобларни қонунни бузган ҳолда олинган далиллар сифатида баҳолаб, тадбиркордан 10,8 млрд сўм компенсация ундириш ҳақидаги даъво талабини рад этган.