Қайд этилишича, ДХХ Call-марказига келиб тушган мурожаат асосида Хизматнинг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган.
Тезкор тадбир давомида Юнусобод тумани Солиқ инспекциясининг икки нафар инспектори ўзаро тил бириктирган ҳолда тадбиркорга ёрдам бериш баҳонасида пул талаб қилгани аниқланган.
Маълум бўлишича, улар хизмат мавқеидан фойдаланиб, тадбиркорга “Chilonzor buyum bozori kompleksi” АЖдан 3 та савдо дўконини ижарага олишда кўмаклашишни ваъда қилган. Шунингдек, танишлари орқали тадбиркорга тегишли МЧЖнинг очиқ савдо тендерида ғолиб бўлишини таъминлаш ва ижара шартномаларини расмийлаштириб бериш эвазига 5 минг АҚШ доллари талаб қилишган.
Тезкор тадбир вақтида солиқ инспекторлари сўралган маблағни олган пайтда ашёвий далиллар билан ушланган.
Ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.
Давлат хавфсизлик хизмати фуқароларни шунга ўхшаш қонунбузилиш ҳолатларига дуч келганда 1520 қисқа рақами орқали мурожаат қилишга чақирди.
