Расмий баёнотда қайд этилишича, Ўзбекистон АҚШ ва Эрон раҳбариятининг ҳал қилувчи паллада намоён этган сиёсий иродаси ва узоқни кўра билишини юксак баҳолайди. Таъкидланишича, эришилган келишув халқаро ҳамжамият узоқ вақтдан буён кутган тинчликка эришиш учун мустаҳкам замин яратади.

Шунингдек, мазкур англашувга эришиш учун зарур шароитларни яратишга ҳисса қўшган Покистон ва Қатарнинг, шунингдек, Туркия, Саудия Арабистони, Миср ҳамда бошқа минтақавий ҳамкорларнинг саъй-ҳаракатлари юқори баҳоланди.

Ўзбекистон музокараларнинг кейинги босқичлари конструктив руҳда давом этиши ва эришилган келишувлар самарали амалга оширилишига умид билдирган.

Баёнотда низо ва қарама-қаршиликларни халқаро ҳуқуқ тамойиллари, ўзаро ҳурмат ҳамда барча томонлар манфаатларини инобатга олган ҳолда дипломатик воситалар орқали ҳал этиш тинчлик ва хавфсизликни таъминлашнинг асосий шарти экани яна бир бор таъкидланган.