Эътиборлиси, мазкур халқаро тадбирни ташкил этишда Марказий Осиёдан илк бор Ўзбекистон ҳамкор ташкилот сифатида иштирок этади. Мамлакатимиз номидан Инновацион ривожланиш агентлиги ҳамташкилотчи сифатида қатнашади.

Тадбир Корея Республикаси Миллий тадқиқот жамғармаси (National Research Foundation of Korea — NRF Korea) ва Ўзбекистон Инновацион ривожланиш агентлиги ҳамкорлигида ташкил этилмоқда. Бу ҳақдаги қарор 2026 йил май ойида Таиланднинг Бангкок шаҳрида ўтказилган GRCнинг 14-йиллик йиғилиши доирасида маъқулланган.

Минтақавий йиғилишда Шарқий, Жанубий ва Жануби-Шарқий Осиё, шунингдек, Тинч океани минтақасидаги мамлакатларнинг миллий илмий тадқиқот фондлари раҳбарлари, илмий грантлар ажратувчи ташкилотлар вакиллари, илмий сиёсатни шакллантирувчи муассасалар ҳамда халқаро тадқиқот дастурлари экспертлари иштирок этади.

GRC қандай халқаро ташкилот?

2012 йилда Вашингтонда ташкил этилган Глобал тадқиқот кенгаши дунёнинг турли мамлакатларида илмий тадқиқотларни молиялаштирувчи миллий ташкилотлар раҳбарларини бирлаштирувчи халқаро ҳамкорлик платформасидир.

Унинг асосий мақсади илмий молиялаштириш тизимлари ўртасида тажриба алмашиш, тадқиқотларни қўллаб-қувватлашнинг самарали механизмларини ривожлантириш ва қитъалараро илмий ҳамкорликни мустаҳкамлашдан иборат.

Кенгаш доирасида илмий тадқиқотларнинг устувор йўналишлари, лойиҳаларни баҳолаш мезонлари, молиялаштириш самарадорлиги, шунингдек, илмий натижаларнинг жамият ва иқтисодиётга таъсирини ошириш каби стратегик масалалар муҳокама қилинади.

GRCнинг минтақавий йиғилишлари эса турли ҳудудларнинг илмий эҳтиёжлари, устувор вазифалари ва ҳамкорлик имкониятларини муҳокама қилиш учун муҳим майдон ҳисобланади. Уларда билдирилган таклиф ва тавсиялар кейинги глобал йиғилишларнинг кун тартиби ҳамда иш йўналишларини шакллантиришда инобатга олинади.

Шу маънода, Сеулдаги учрашув нафақат минтақавий мулоқот, балки жаҳон илмий ҳамжамиятининг келгуси фаолиятига дахлдор ёндашувларни ишлаб чиқиш жараёнининг ҳам бир қисмидир.

Ўзбекистон учун қандай имкониятлар очилади?

Инновацион ривожланиш агентлигининг мазкур жараёнда ҳамташкилотчи сифатида иштирок этиши мамлакатимиз учун бир нечта муҳим имкониятни юзага келтиради.

Аввало, бу Ўзбекистоннинг илмий дипломатиясида янги босқични англатади. Мамлакатимиз энди халқаро илмий тадбирлар иштирокчиси сифатидагина эмас, балки уларни ташкил этиш ва минтақавий илмий кун тартибини шакллантиришда бевосита қатнашадиган ҳамкор сифатида ҳам намоён бўлмоқда.

Иккинчидан, жаҳоннинг етакчи илмий молиялаштириш ташкилотлари билан тўғридан-тўғри алоқаларни ривожлантириш учун янги майдон пайдо бўлади. Бу келгусида қўшма илмий танловлар, халқаро грант дастурлари, тадқиқот консорциумлари ва кўп томонлама молиялаштириш механизмларини йўлга қўйишга хизмат қилиши мумкин.

Айниқса, илмий лойиҳаларни баҳолаш, молиялаштириш самарадорлигини ошириш, халқаро экспертлар иштирокини кенгайтириш ва тадқиқот натижаларини амалиётга жорий этиш бўйича илғор тажрибаларни ўрганиш миллий илмий тизим учун муҳим аҳамиятга эга.

Учинчидан, ҳамкорлик Ўзбекистоннинг Марказий Осиёдаги илмий жараёнлардаги иштирокини кучайтиришга хизмат қилади. Минтақада шаклланаётган илмий салоҳият, тадқиқот инфратузилмаси ва янги технологик ишланмаларни халқаро ҳамжамиятга кенгроқ танитиш учун қўшимча имкониятлар очилади.

Энг муҳими — ўзбек олимлари учун янги имкониятлар

Халқаро илмий ҳамкорликнинг якуний самараси фақат ташкилотлар ўртасидаги келишувлар билан эмас, балки олимлар ва тадқиқотчилар учун яратиладиган имкониятлар билан ҳам белгиланади.

GRC доирасидаги алоқалар орқали ўзбек олимлари хорижий тадқиқот марказлари ва илмий фондлар билан ҳамкорликни ривожлантириши, халқаро тадқиқот консорциумларига қўшилиши, ўз илмий ишланмаларини жаҳон майдонида тақдим этиши учун янги имкониятларга эга бўлиши мумкин.

Бундан ташқари, илмий натижаларни баҳолашда сифат, илмий таъсир ва амалий аҳамиятга устуворлик бериш, очиқ илм-фан тамойилларини кенгайтириш ҳамда тадқиқотларда халқаро стандартларни қўллаш борасидаги тажрибалар миллий илм-фан ривожига ижобий таъсир кўрсатиши мумкин.

Бу, айниқса, халқаро илмий майдонга кириб келаётган ёш олимлар, янги илмий мактаблар ва тадқиқот гуруҳлари учун муҳимдир. Зеро, бугунги илм-фанда тадқиқотчининг салоҳияти билан бир қаторда унинг халқаро илмий тармоқларга интеграциялашуви ҳам катта аҳамият касб этмоқда.

Ҳамкорлик қандай бошланган эди?

Ўзбекистоннинг GRC доирасидаги иштироки Сеулдаги минтақавий йиғилиш билан бошлангани йўқ.

2026 йил май ойида Бангкок шаҳрида ўтказилган кенгашнинг 14-йиллик йиғилишида Инновацион ривожланиш агентлиги вакили «Research for Sustainable Communities» мавзусидаги муҳокама сессиясига модераторлик қилди.

Унда турли мамлакатлар вакиллари илм-фан ва инновацияларнинг ижтимоий, экологик ҳамда технологик муаммоларни ҳал этишдаги ўрни, сунъий интеллектдан самарали фойдаланиш ва очиқ илм-фан тамойилларини ривожлантириш масалаларини муҳокама қилди.

Айнан шу йиғилиш якунида Ўзбекистон Инновацион ривожланиш агентлигининг Сеулдаги минтақавий тадбирни ташкил этишда ҳамкор ташкилот сифатида иштирок этиши маъқулланган эди.

Шунингдек, 2026 йил октябрь ойида Агентлик делегациясининг Корея Республикасига хизмат сафари давомида NRF Korea Халқаро алоқаларни мувофиқлаштириш бошқармаси директори Hyesoo Kim билан учрашув ўтказилди. Унда тадбир дастури, ишчи гуруҳлар сессиялари, маърузачилар ва модераторлар иштироки, ташкилий ҳамда техник масалалар муҳокама қилинди.

Бу ҳамкорликнинг декларатив баёнотлар билан чекланиб қолмаётгани, балки аниқ ташкилий ишлар ва амалий мулоқотлар орқали ривожланаётганини кўрсатади.

Халқаро эътироф — янги масъулият

Шубҳасиз, Ўзбекистоннинг GRC Осиё-Тинч океани минтақавий йиғилишида ҳамташкилотчи сифатида иштирок этиши мамлакатимиз илм-фани учун янги имкониятлар эшигини очади.

Бироқ халқаро майдонда эътироф этилишнинг ўзи якуний мақсад эмас. Асосий вазифа — бундай имкониятларни миллий илм-фан манфаатларига йўналтириш, олимлар учун янги ҳамкорлик каналларини очиш, илмий тадқиқотларни молиялаштириш сифатини ошириш ва миллий илмий ишланмаларнинг халқаро миқёсдаги рақобатбардошлигини мустаҳкамлашдир.

Агар Сеулдаги мулоқотлар аниқ қўшма лойиҳалар, грант дастурлари ва илмий ҳамкорлик ташаббусларига айланса, бунинг самараси нафақат илмий муассасалар, балки бутун мамлакатнинг инновацион тараққиётида ҳам намоён бўлади.