Қонунга кўра, Ўзбекистон ҳудудида жисмоний ва юридик шахслар томонидан сақланадиган ёки кўпайтириладиган ҳайвонлар мажбурий тартибда идентификация қилиниши ва давлат рўйхатидан ўтказилиши лозим.
Ҳужжатда ҳайвонларни идентификация қилиш ва рўйхатга олиш муддатлари ҳам белгиланган.
Жумладан,
- қорамол, қўй, эчки ва туялар туғилганидан кейин 14 кун ўтгач,
- отлар 4 ойдан кейин,
- чўчқалар 1 ойдан кейин,
- ит ва мушуклар эса 3 ойдан кейин идентификация қилиниши керак. Бу жараён белгиланган муддат тугаганидан сўнг бир ой ичида амалга оширилиши шарт.
Шунингдек, сақлаш ёки кўпайтириш мақсадида Ўзбекистонга олиб кирилган ҳайвонлар мамлакатга киритилган санадан бошлаб 21 кун ичида идентификация қилиниши лозим.
Қонунга мувофиқ, ҳайвон сўйилган, нобуд бўлган, ўлган, йўқ қилинган ёки мамлакат ҳудудидан олиб чиқилган тақдирда, у етти кун ичида ҳисобдан чиқарилади.
Бундан ташқари, ваколатли давлат органи ҳайвон эгасининг мурожаати асосида беш иш куни ичида ҳайвонни идентификация қилиши ва рўйхатдан ўтказиши белгиланган.
